Hirðarnir myndu tísta um Jesúbarnið í dag

Biskup Íslands talaði í prédikun sinni um fjárhirðana sem leituðu uppi Jesúbarnið eftir fæðingu þess í Betlehem fyrir rúmum 2.000 árum. Hún segir að í dag myndu þeir eflaust nýta sér samfélagsmiðla til að boða fagnaðarerindið um fæðingu Krists.

Biskup sagði að allir geti verið fjölmiðlamenn og konur nú, og komið upplýsingum til almennings á örskotsstundu.

Hirðarnir hefðu ábyggilega sett myndir á instagram, tíst á twitter eða sagt frá á facebook ef það hefði verið til fyrir 2.000 árum um reynslu sína og ferðalag til Betlehem.

Agnes M. Sigurðardóttir biskup segir það mikilvægt að fólki geri það sama og hirðarnir, leiti uppi barnið og sjái það. Barnið sem enn í dag er myndlíking fyrir allt hið góða í lífinu.

„Þeir sem líta barnið augum á einn eða annan hátt verða fyrir einhverjum áhrifum, sem eru góð áhrif, og fylgja þeim út í lífið,“ sagði Agnes í samtali við fréttastofu.