Sprengjumaðurinn í Dortmund fékk þungan dóm

Einstaklingurinn sem reyndi að sprengja upp rútu þýska fótboltaliðsins Borussia Dortmund var í dag dæmdur í fjórtán ára fangelsi í Þýskalandi.

Ekki er vitað hver þessi maður er en hann er kallaður Sergej W í málsskjölum. 29 ára gamall Rússi sem fluttist til Þýskalands er hann var 13 ára gamall. Hann hefur rétt á nafnleynd. Hann var sakfelldur fyrir að hafa reynt að myrða 28 manns.

Hann á þess utan að greiða sekt upp á rúmar tvær milljónir króna til handa varnarmanninum Marc Bartra sem meiddist mest í árásinni. Hann þurfti að fara í aðgerð þar sem sprengjubrot var fjarlægt úr handlegg hans.

Sergej sprengdi þrjár sprengjur er rúta liðsins fór frá hóteli sínu fyrir leik í Meistaradeildinni. Mikil mildi þótti að enginn skildi látast í þessari árás.

Saksóknari sagði að Sergej W. hefði slegið lán og síðan veðjað á að hlutabréf í Dortmund myndu falla. Þannig ætlaði hann að græða. Hann reyndi að klína glæpnum á hryðjuverkasamtök en komst ekki upp með það.

Saksóknari vildi fá Sergej dæmdan í lífstíðarbann. Sprengjumaðurinn sagðist aldrei hafa ætlað að myrða neinn.