Breytt veður leiðir hvalina af leið

Kanadamenn velta því nú fyrir sér hvort hvalir séu að breyta ferðavenjum vegna loftslagsbreytinga, að því er grænlenska útvarpið segir.

Tveir búrhvalir sáust fyrr í haust rétt utan við Pond Inlet á Baffinslandi, vestan Grænlands. Þeir hafa ekki áður sést svona norðarlega.

Á vef grænlenska útvarpsins segir að höfuð búrhvala sé fremur mjúkt og þess vegna mögulegt að þeir muni ekki geta rutt sér leið í gegnum ísinn syndi þeir ekki suður á bóginn áður en vetur gengur í garð.