Brittanny mögnuð er Keflavík skellti Íslandsmeisturunum

Íslandsmeistarar Hauka fengu skell er Keflavík kom í heimsókn í Schenker-höllina í kvöld í Dominos-deild kvenna. Keflavík hafði betur, 86-69.

Það var í raun ljóst frá upphafi í hvað stefndi. Eftir fyrsta leikhlutann leiddu gestirnir úr Keflavík með tíu stigum og voru svo 48-35 yfir í hálfleik.

Svipað var uppi á tenignum í síðari hálfleik en Brittanny Dinkins var stórkostleg í liði Keflavíkur. Hún skoraði 38 stig, tók níu fráköst og gaf átta stoðsendingar. Ótrúleg.

Í liði Hauka átti Þóra Kristín Jónsdóttir einnig mjög góðan leik en hún skoraði 25 stig. Næst kom LeLe Hardy með fimmtán stig og sextán fráköst.

Bæði lið eru með fjögur stig eftir fyrstu fjóra leikina og sitja saman í þriðja til fjórða sæti deildarinnar, Keflavík í því þriðja á betri innbyrðis viðureign. Þrjú önnur lið eru með fjögur stig.

Nýliðar KR eru á toppnum ásamt Snæfell eftir sigur á Snæfell, 72-69, í hörkuleik í DHL-höllinni í kvöld. KR byrjaði af krafti og var 22-9 yfir eftir fyrsta leikhlutann.

Hægt og rólega náðu gestirnir úr Stykkishólmi að koma sér inn í leikinn og jöfnuðu svo leikinn í fjórða leikhlutanum en nýliðar KR sýndu seiglu og unnu þriggja stiga sigur, 72-69.

Í liði KR var stigaskorið ansi jafnt. Kiana Johnson skoraði fimmtán stig og gaf níu stoðsendingar. Orla O'Reilly gerði fjórtán stig, tók tólf fráköst og gaf fimm stoðsendingar.

Í liði Snæfells var Kristen Denise McCarthy stigahæst með 23 stig en auk þess gaf hún sex stoðsendingar. Katarina Matijevic kom næst með nítján stig og ellefu fráköst.

Snæfell og KR eru jöfn á toppi deildarinnar, bæði með sex stig, en Benedikt Guðmundsson greinilega að gera góða hluti með nýliða KR.

Breiðablik er enn án stiga eftir fjögurra stiga tap, 71-67, gegn Val í Vodafone-höllinni í kvöld. Góður annar leikhluti lagði grunninn að sigrinum hjá silfurliði Vals frá síðustu leiktíð.

Hallveig Jónsdóttir var stigahæst hjá Val með tuttugu stig en Valur er með fjögur stig ásamt fimm öðrum liðum. Breiðablik er án stiga á botninum en Kelly Faris var stigahæst Blika með 26 stig.

Skallagrímur vann átta stiga sigur á Stjörnuni, 79-71, eftir mjög kaflaskiptan leik. Bæði lið eru með fjögur stig eftir fyrstu fjóra leikina, eins og fjölmörg önnur lið í deildinni.

Bryersha Blair skoraði 21 stig, tók níu fráköst og gaf sex stoðsendingar fyrir Skallagrím en Danielle Rodriguez átti enn einn stórleikinn fyrir Stjörnuna. Hún skoraði 24 stig, tók tíu fráköst og gaf átta stoðsendingar.