Rétttrúnaðurinn hefur hrakið kirkjuna út í horn að mati Björns Inga

Björn Ingi Hrafnsson fjölmiðlamaður er uggandi vegna þröngrar stöðu kirkjunnar og hvetur kirkjunnar menn til þess að vera beinni í baki.

„Ég skil ekki bara af hverju kirkjunnar fólk er alltaf nánast að biðjast afsökunar a tilveru sinni og i endalausri vörn. Það vantar allt sjálfstraust hjá þeim i umræðunni,“ segir Björn Ingi í samtali við Vísi.

Meirihlutinn verður að fara að láta í sér heyra

Vísir greindi frá því fyrir fáeinum dögum að Íslendingum sem skráðir eru í Þjóðkirkjuna fer mjög fækkandi. Alls voru 65,6 prósent landsmanna, sem búsettir eru hér á landi, skráðir í Þjóðkirkjuna um síðustu mánaðarmót, eða 233.062 manns. Skráðum hefur fækkað um 2.029, eða 0,9 prósent, frá 1. desember 2017. Þetta sýnist Birni Ingi hið versta mál. En, hvað vill hann að verði gert?

„Að kirkjunnar menn fari að tala af meira sjálfstrausti og veki athygli á öllu því frábæra starfi sem þar er unnið og okkur finnst flestum svo sjálfsagt en er það ekki.“

Björn Ingi skrifaði um þessa uggvænlegu þróun, að hans mati, á Facebook-síðu sína og segist hafa fengið ótrúlega mikil viðbrögð. „Og greinilegt að hinn þögli meirihluti telur að snúa beri vörn í sókn.“

Björn Ingi er kirkjurækinn enda mjög trúaður maður, hann fer með bænirnar með börnum sínum á hverjum degi. Og hann segist jafnframt hafa rætt þessa stöðu við kirkjunnar menn, bæði lærða og leika. En, má ekki hafa samúð með þröngri stöðu kirkjunnar manna, að mæta kröfunni um að kirkjan sé nútímaleg en haldi jafnframt í gömul og góð gildi?

Rétttrúnaðurinn hefur hrakið kirkjuna út í horn

„Jú eflaust en þetta er ekkert bundið við Ísland. Allar kannanir sýna gríðarlegan stuðning landsmanna við kirkjuna, til dæmis þegar stjórnlagaþing ræddi nýja stjórnarskrá og lagði til aðskilnað ríkis og kirkju og héldu að það yrði samþykkt var það þvert á móti fellt í þjóðaratkvæðagreiðslu.“

Og Björn Ingi heldur áfram: „Mikill meirihluti landsmanna vill heimila heimsóknir skólabarna i kirkjur a aðventunni en samt hrekst kirkjan sífellt til baka í því eins og það sé eitthvað mjög óæskilegt fyrir börn að upplifa.“

Viltu þá meina að kirkjunnar menn hafi látið ríkjandi rétttrúnað reka sig út í horn?

„Já, auðvitað.“

Kirkjan nýtur meiri stuðnings en hún gerir sér grein fyrir

Björn Ingi segir engan vera að tala fyrir einhverri bókstafstrú heldur að gömul gildi sem njóta almannahylli fíoi að eiga sinn sess i tilverunni.

„Ég þekki fjölmarga sem ekki segjast trúaðir en segja svo að einstakir prestar kirkjunnar hafi reynst sér einstaklega vel a erfiðum stundum, til dæmis við fráfall ástvina, og gera sér þá betur grein fyrir samfélagslegu hlutverki kirkjunnar.“

Björn Ingi segir kirkjuna njóta miklu meiri stuðnings en kannski kirkjunnar menn átti sig á sjálfir, í hávaða þeirrar umræðu sem geisar til dæmis á netinu.

 

Skortur á sjálfstrausti helsti vandinn

„Já. Einmitt. Á ensku er talað um „the silent majority“ sem er seinþreyttur til vandræða en hefur samt sterkar skoðanir og vill ekki hrekjast endalaust að ástæðulausu.“



En, sérðu ekkert annað fyrir þér til aðgerða annað en aukið sjálfstraust í tal kirkjunnar þjóna?

„Jú. Ég hvet allt trúað fólk, hvort sem það biður bænir reglulega eða fer örsjaldan i kirkju og hefur sina trú fyrir sig, að fela það ekki heldur vera stolt af því og tala um það. Það eru miklu fleiri i þeim sporum en margir halda. Þetta vinnst ekki efst i einhverjum valdalögum heldur hjá fólkinu i landinu.“

Björn Ingi fæst þessa dagana við ritstörf. „Það sem ég hef fengist við frá unga aldri og mun gera um ókomna tíð.“