Aron og félagar heimsmeistarar annað árið í röð

Barcelona er heimsmeistari félagsliða í handbolta eftir sigur á þýska liðinu Fuchse Berlin en úrslitaleikurinn fór fram í Katar í dag.

Um var að ræða Íslendingaslag þar sem að Aron Pálmarsson var í eldlínunni hjá Barcelona á meðan Bjarki Már Elísson var í horninu hjá Berlínarrefunum.

Fuchse Berlin byrjaði leikinn betur og leiddi stærstan hluta fyrri hálfleiks en Barcelona náði að koma til baka fyrir leikhlé og leiddu Spánverjarnir með einu marki í leikhléi, 13-12.

Börsungar héldu frumkvæðinu í leiknum í síðari hálfleik og unnu að lokum nokkuð öruggan fimm marka sigur, 29-24.

Aron skoraði tvö mörk úr fimm skotum fyrir Börsunga á meðan Bjarki Már var markahæstur í liði Fuchse með fimm mörk úr fimm skotum.

Þetta er í fjórða sinn sem Barcelona vinnur HM félagsliða en sömu lið öttu kappi í úrslitaleiknum í fyrra og þar fóru Börsungar einnig með sigur af hólmi.