Fótbolti Breiðablik er í dauðafæri til að vinna Íslandsmeistaratitilinn í sautjánda sinn eftir 3-0 sigur á Þór/KA í uppgjöri tveggja efstu liða Pepsi-deildar kvenna á laugardaginn. Blikar eru nú með fimm stiga forskot á norðanstúlkur þegar tvær umferðir eru eftir.
Þór/KA vann fyrri leikinn gegn Breiðabliki í sumar sem og báða deildarleiki liðanna í fyrra. Blikar náðu hins vegar fram hefndum á laugardaginn og sigur þeirra var á endanum öruggur.
Fyrsta markið kom á 33. mínútu. Alexandra Jóhannsdóttir skallaði þá boltann í netið eftir fyrirgjöf Ástu Eirar Árnadóttur frá hægri. Gestirnir frá Akureyri vildu fá vítaspyrnu á 66. mínútu þegar boltinn fór í hönd Guðrúnar Arnardóttur en Bríet Bragadóttir dæmdi ekki neitt.Lítil hamingja var með það á varamannabekk Þórs/KA og aðstoðarþjálfarinn Andri Hjörvar Albertsson var rekinn upp í stúku fyrir mótmæli í annað skiptið í sumar.
Þegar tvær mínútur voru til leiksloka skoraði Alexandra sitt annað mark eftir sendingu varamannsins Áslaugar Mundu Gunnlaugsdóttur. Skömmu síðar fékk Bianca Sierra, varnarmaður Þórs/KA, sitt annað gula spjald og þar með rautt. Í uppbótartíma skoraði Agla María Albertsdóttir svo þriðja mark Blika og gulltryggði sigur þeirra. Breiðablik hefur unnið alla átta heimaleiki sína í Pepsi-deildinni með markatölunni 21-2.
Ef Breiðablik vinnur Selfoss í næstu umferð verður liðið meistari, hvernig sem leikur Þórs/KA og Vals á sama tíma fer. Þór/KA verður að vinna Val og treysta á að Selfoss taki stig af Breiðabliki til að eiga möguleika á að verja Íslandsmeistaratitilinn í lokaumferðinni.
Nýliðarnir Selfoss og HK/Víkingur gerðu 1-1 jafntefli á laugardaginn. Unnur Dóra Bergsdóttir kom Selfyssingum yfir á 32. mínútu en Kader Hancer jafnaði eftir tæplega klukkutíma leik.
Bæði lið eru með 17 stig og örugg með sæti sitt í Pepsi-deildinni. Þetta er í fyrsta sinn sem HK/Víkingur heldur sæti sínu í efstu deild. Í fyrri tvö skiptin sem liðið kom upp féll það strax aftur.
Þá vann ÍBV 1-2 útisigur á Grindavík. Eyjakonur, sem eru ósigraðar í síðustu fjórum leikjum, eru í 5. sæti deildarinnar. Staða Grindvíkinga er hins vegar erfið. Þær eru með tíu stig í níunda og næstneðsta sæti, þremur stigum á eftir KR-ingum sem eru í 8. sæti. Þá er markatala KR mun betri. Það verður því að teljast líklegast að Grindavík fylgi FH niður í Inkasso-deildina.
Níu fingur komnir á bikarinn
