Forstjóri Sjúkratrygginga kátur með niðurstöðu héraðsdóms

Héraðsdómur Reykjavíkur felldi í gær úr gildi ákvörðun Sjúkratrygginga Íslands (SÍ) um að hafna umsókn Ölmu Gunnarsdóttur sérgreinalæknis um aðild að rammasamningi stofnunarinnar við sérgreinalækna. Sjö sambærileg mál til viðbótar bíða dóms. Forstjóri SÍ fagnar niðurstöðunni.

Langvarandi og veruleg framúrkeyrsla hefur verið á fjárlagalið samningsins. Af þeim sökum tók heil­brigðis­ráðherra þá ákvörðun að ekki yrðu teknir fleiri læknar inn á samninginn. Var það fyrst gert um áramótin 2016 og sú ákvörðun ítrekuð 26. apríl og 28. ágúst 2017.

Umsóknir læknanna nú voru frá því í september 2017 og var þeim synjað af SÍ með vísan til ákvörðunar ráðherra. Að mati dómsins voru fyrrgreind tilmæli „ekki í nægjanlegu samræmi við áskilnað löggjafans um faglegt mat á umsókn [læknisins]“. Þá voru þau andstæð rammasamningnum og leiddu til þess að ekki fór fram fullnægjandi mat á umsókninni. Slíkt væri brot á lögmætisreglu stjórnsýsluréttarins og andstætt reglunni um skyldubundið mat stjórnvalda. Ákvörðunin var því ógilt.

„Þetta eru alls átta nákvæmlega eins mál. Það var samkomulag um að taka eitt mál út úr og flytja til að fá dóm sem yrði til leiðsagnar í öllum málunum. Alma var fremst í stafrófsröðinni,“ segir Gísli Guðni Hall, lögmaður Ölmu og hinna læknanna sjö. Hann var að vonum ánægður með niðurstöðuna.

Auk læknanna átta sem stefnt hafa ríkinu hefur níu sérgreinalæknum til viðbótar verið hafnað um aðild að samningnum. Læknarnir sautján starfa í þrettán mismunandi sérgreinum og er staða þeirra nokkuð mismunandi. Sumir eru enn búsettir erlendis og bíða þess að koma heim meðan aðrir eru hér heima. Það að fá ekki aðild að samningnum þýðir að SÍ taka ekki þátt í greiðslu sjúklinga hjá viðkomandi lækni en kostnaðarþátttaka SÍ er um 30 prósent.

„Þetta hefur í för með sér að viðkomandi læknir þarf í raun að rukka sinn sjúkling um kannski þrefalt hærra gjald en læknir sem er aðili að samningnum og þetta eru þess vegna læknar sem starfa á sömu starfsstöðinni. Misréttið er því augljóst,“ segir Gísli. „Þetta hefur grundvallarþýðingu fyrir störf og framtíðarmöguleika lækna. Læknarnir vilja bjóða upp á þjónustuna og það er sannarlega þörf fyrir hana. Málið snýst að stærstum hluta um að gera læknunum kleift að starfa við það sem þeir hafa menntað sig í, á jafnréttisgrundvelli.“

Svandís Svavarsdóttir heilbrigðisráðherra baðst undan viðtali um dóminn þar til hún hefur fundað með ríkislögmanni um niðurstöðuna og áhrif hans. Það verður gert í dag.

Vill ekki áfrýja

„Ég er ánægður með dóminn og tel hann byggja á mikilvægi þess að staðið sé við gerða samninga,“ segir Steingrímur Ari Arason, forstjóri SÍ. Dómurinn snúist um réttarstöðu sjúkratryggðra, atvinnuréttindi lækna og mikilvægi þess að marka þeim umgjörð. „Er það mín tillaga að rétt sé að virða niðurstöðuna.“