Kennie Chopart hefur skrifað undir tveggja ára framlengingu á samningi sínum við KR og verður Daninn því áfram í Vesturbænum.
Samningur Kennie átti að renna út eftir leiktíðina sem er nú í gangi en KR-ingar og Kennie hafa komist að samkomulagi um framlengingu sem heldur honum hjá KR til 2020 í það minnsta.
Kennie gekk í raðir KR fyrir tímabilið 2016 en þá var Bjarni Guðjónsson, þjálfari KR. Hann er nú aðstoðarþjálfari liðsins en þjálfari liðsins er að sjálfsögðu Rúnar Kristinsson.
Á Íslandi hefur Kennie leikið 121 leik í efstu deild en hann hefur skorað í þeim 31 mark. Hann hefur leikið með Fjölni, KR og Stjörnunni hér á landi.
KR er í fjórða sæti deildarinnar með 24 stig, stigi á undan FH, en þessi lið eru meðal þeirra sem berjast um fjórða sætið í deildinni.
Kennie framlengir til ársins 2020
