Ný stjórn á 20 ára afmæli FKA

Ný stjórn Félags kvenna í atvinnulífinu (FKA) var kjörin á aðalfundi félagsins á miðvikudag. Fram kemur í tilkynningu frá FKA að frambjóðendur í stjórn hafi verið fjórar konur í þrjú sæti. Kosningu í stjórn hlutu Hulda Ragnheiður Árnadóttir, framkvæmdastjóri Viðlagatrygginga Íslands, Lilja Bjarnadóttir, lögfræðingur og eigandi Sáttaleiðin ehf. og þá hlaut Anna Þóra Ísfold, ráðgjafi og eigandi Isfold markaðsráðgjöf, endurkjör.

Að auki sitja áfram í stjórn frá fyrra ári Áslaug Gunnlaugsdóttir, lögmaður og einn eiganda LOCAL lögmanna, Guðrún Ragnarsdóttir, ráðgjafi og meðeigandi ráðgjafafyrirtækisins Strategíu ehf., Ragnheiður Aradóttir, stofnandi og eigandi viðburðafyrirtækisins PROevents og formaður FKA, Rakel Sveinsdóttir framkvæmdastjóri Spyr.

Haft eftir Rakel í tilkynningunni að framundan sé spennandi ár hjá FKA, sem fagnar 20 ára starfsafmæli sínu. „Það er því mikill fengur fyrir okkur að til stjórnarsetu skuli bjóðast kröftugur hópur kvenna, með fjölbreyttan bakgrunn og reynslu en þess má geta að til viðbótar við stjórnarkjör á aðalfundi, voru ríflega 100 konur skráðar í nefndar- og deildarstörf fyrir starfsárið 2018-2019. Ég hlakka mikið til samstarfsins með þessum öfluga hópi kvenna sem og þeim 1150 leiðtogakonum sem nú eru virkir félagsmenn í FKA og fer hratt fjölgandi,” segir Rakel.

FKA samanstendur af ríflega ellefuhundruð konum á öllum sviðum atvinnulífsins og telst yfir helmingur þeirra til forstjóra, framkvæmdastjóra og eiganda fyrirtækja. Meðal stærri verkefna FKA síðastliðin ár hefur verið átak til að auka ásýnd kvenna í fjölmiðlum, aukin hlutdeild kvenna í stjórnum félaga og nú síðast verkefnið Jafnvægisvogin, sem ætlað er að stuðla að aukinni hlutdeild kvenna í efra lagi fyrirtækja.