Bráðaaðgerðir vegna fíknivanda hjá hópi ungmenna

Unglingum sem leita meðferðar hjá Barnaverndarstofu og hafa notað sprautur og lyfseðilsskyld lyf til vímuefnaneyslu hefur fjölgað á undanförnum árum. Þá sýna tölur SÁÁ að fleiri ungmenni leita til samtakanna vegna fíknivanda en áður.

Það sem af er ári hafa 74 leitarbeiðnir borist lögreglu vegna týndra barna en í flestum tilfellum er um að ræða börn sem nota vímuefni eða eiga við fíknivanda að etja. Þá hafa aldrei borist jafn margar leitarbeiðnir og í mars en þá var 34 barna leitað. Vísa hefur um tuttugu börnum frá Stuðlum á þessu ári vegna plássleysis.

Í vikunni þurfti að þurfti að vista 14 og 15 ára stúlkur í miklum fíkniefnavanda í fangaklefa því engin önnur úrræði voru í boði.

Ásmundur Einar Daðason félags- og jafnréttismálaráðherra kynnti aðgerðir vegna vandans á fundi ríkistjórnarinnar í gær og en hann segir óábyrgt samfélag sem bregðist ekki við svona þróun.

Tvö ný úrræði

„Við erum að vinna að því að því að koma upp nýju úrræði sem miðar að því að aðstoða einstaklinga sem hafa verið lengi í kerfinu að aðlagast samfélaginu á nýjan leik. Þá heimilislífi, skóla og þess háttar. Við erum að vonast til að það úrræði verði í boði eftir um tvær vikur. Síðan ætlum við að ráðast í kortlagninu á þeim úrræðum sem eru í boði hjá stjórnvöldum og hvort að það þurfi að gera meira eða hvað þurfi að gera. Það er gert ráð fyrir að þeirri vinnu ljúki eftir um tvo mánuði.“ 

Hann segir að eftir að koma í ljós hversu miklum fjármunum verði varið í verkefnin. 

„Miðað við umræður í ríkisstjórn og þann bráðavanda sem þarna liggur fyrir er alveg ljóst að það mun þurfa að setja fjármagn í þetta og ég held að það er fullur pólitískur vilji til þess.“

Samfélagslegt átak mikilvægt

Ásmundur Einar segir að bregðast þurfi við á öllum sviðum samfélagsins.

„Við þurfum að vera á tánum í þessum málum bæði hvað varðar forvarnir, löggæslu og eftirlit og í ljósi þess vanda sem nú liggur fyrir þurfum við að spyrja okkur hvort þar þurfi ekki líka samhent átak.“