Puidgemont hættir við

Carles Puidgemont, leiðtogi aðskilnaðarsinna Katalóna hefur tilkynnt að hann sækist ekki lengur eftir því að verða aftur útnefndur forseti Katalóníu. BBC greinir frá.

Puidgemont hefur verið í útlegð frá Spáni í Belgíu eftir að spænsk stjórnvöld gripu til aðgerða þegar að meirihluti Katalóna samþykkti í atkvæðagreiðslu að lýsa yfir sjálfstæði héraðsins frá Spáni.

Hefur hann lýst yfir stuðningi við Jordi Sanchez og segir að hann ætti að verða útnefndur forseti sjálfstjórnarhéraðsins. Sanchez hefur verið í haldi spænskra yfirvalda síðustu mánuði.

Segir Puidgemont að með þessu sé hann að reyna að koma til móts við spænsk yfirvöld í von um að lausn finnist í deilu aðskilnaðarsinna og spænskra yfirvalda.