Sjálfakandi bílar í hröðustu tækniþróun sem sést hefur

Bílasérfræðingar segja þróun sjálfkeyrandi rafbíla hraðari en nokkur sá fyrir. Frönsku Renault-verksmiðjurnar hafa nú kynnt bíl sem tengdur er sýndarveruleika þar sem ökumaðurinn getur horft á annað landslag en sést úr bílnum. Fjallað var um þetta í fréttum Stöðvar 2. 

Renault kynnti tilraunabílinn Symbioz í vikunni og hann er ekki aðeins sjálfkeyrandi heldur getur ökumaðurinn brugðið sér inn í gerviheim.

Í fréttinni má sjá Mathieu Lips, þróunarstjóra hjá Renault, sitja í ökumannssætinu á franskri hraðbraut en horfandi á sýndarlandslag sem minnir á Kanada. Svo velur hann annan sýndarheim og er þá farinn að fljúga úti í náttúrunni. 

Bíllinn annast aksturinn, greinir umhverfið og heldur öruggri fjarlægð frá öðrum ökutækjum og hindrunum. Og veit hvar á að stoppa til að greiða vegtollinn. 

Hinni árlegu bílasýningu í Detroit lauk um síðustu helgi en hún er ein sú stærsta í heimi. Í ár voru það sjálfkeyrandi bílar sem áttu sviðið. 

„Ég held að 2018 verði minnst sem ársins þegar þessi vísindaverkefni byrjuðu að breytast í verslunarvöru,” sagði Jack Weast, yfirverkfræðingur hjá tölvurisanum Intel.

„Bara fyrirtækið okkar mun afhenda meira en tvær milljónir sjálfkeyrandi bíla á þessu ári og þeir munu byrja að bjarga mannslífum hér í dag,” sagði Jack Weast. 

„Sjálfkeyrandi bílar eru enn í þróun en það gengur svo hratt. Ég held að þeir þróist hraðar en nokkur tækni sem við höfum séð áður því fréttirnar á þriggja mánaða tímabili geta breyst gríðarlega. Ég held að margir bílaframleiðendur séu að flýta sér að þróa tæknina,” sagði Jessica Caldwell, bílasérfræðingur Edmunds.com. 

„Hins vegar þurfa lög og tryggingar að vera fyrir hendi og allir þessir innviðir því þetta snýst ekki bara um tækni bílaframleiðenda,” bætti hún við.

Bílabyltingin mun taka tíma. En jafnvel í sjálfri Ameríku er því nú spáð að einkabílinn víki með sjálfkeyrandi vögnum. 

„Það líður langur tími áður en við höfum þá í innkeyrslunni hjá okkur og þegar það verður munum við ekki eiga þá. Einhver annar mun eiga þá, við verðum með áskriftarþjónustu og borgum fyrir hvern ekinn kílómetra,” sagði Michelle Krebs, bílasérfræðingur Autotrader. 

„Allt viðskiptamódelið fyrir fólksflutninga mun breytast en ég held að það sé miklu lengra í það en það sem við heyrum talað um,” sagði hún. 

Hér má sjá frétt Stöðvar 2: