Maðurinn tilkynntur í fjórgang

Lögregla var látin vita af meintum brotum starfsmanns á skammtímaheimili fyrir ungmenni í vanda árið 2015 að sögn móður brotaþola. Sviðsstjóri velferðarsviðs borgarinnar leggur til að farið verði í áhættugreiningu á sólarhringsstarfsemi fyrir börn og unglinga.

Móðir drengs sem dvaldi á heimili sem maðurinn, sem sakaður hefur verið um kynferðisbrot gegn börnum starfaði á, segist hafa tilkynnt hann til lögreglu í lok árs 2015. Hún segir son sinn hafa verið misnotaðan af manninum á skammtímaheimili á Laugarásveginum í kringum árið 2010.

Þegar sonur hennar var orðinn nítján ára gamall og hafði glímt við mikla erfiðleika eftir brotin leitaði hún til lögreglunnar á höfuðborgarsvæðinu. Í viðtali greindi hún frá nafni mannsins, nafni sonar hennar og sagði manninn starfa fyrir barnavernd Reykjavíkur. Hún gat hins vegar ekki lagt fram kæru fyrir hönd sonarins þar sem hann var orðinn lögráða.

Tilkynningar sendar árin 2002 og 2008

Þetta er tveimur árum eftir að annar einstaklingur kærði sama mann fyrir kynferðisbrot. Þau brot töldust fyrnd en móðir drengsins gerir athugasemdir við aðgerðarleysi þar sem nafn mannsins hafði áður ratað inn á borð lögreglunnar.

Samkvæmt heimildum fréttastofu var þetta í fjórða sinn sem yfirvöld voru látin vita af manninum en tilkynningar voru sendar til barnaverndaryfirvalda árin 2002 og 2008. Honum var loks vikið frá störfum í síðustu viku vegna kæru sem var lögð fram í ágúst í fyrra.

Regína Ásvaldsdóttir, sviðsstjóri velferðarsviðs Reykjavíkurborgar, segist líta málið mjög alvarlegum augum og mun leggja til að farið verði í áhættugreiningu á sólarhringsstarfsemi fyrir börn og unglinga. Málið verður rætt á fundi velferðarráðs á morgun.

Á sólarhringsstofnunum er yfirleitt einungis einn starfsmaður á vakt í um fjórar til fimm klukkustundir á hverri nóttu og segir Regína að fyrirkomulagið sé eitt af því sem þurfi að skoða.

Málið var tekið upp í umræðum um störf Alþingis í dag og kallaði þingkona Vinstri Grænna að bundið yrði þannig um hnútana að börn í umsjá borgarinnar yrðu aldrei í kringum kærða einstaklinga. 

„Ef það er eitthvað sem þarf að laga í lagabókstafnum og lítur að því að útvíkka enn frekar heimildir til að opna sakaskrár þegar fólk er ráðið til starfa með börnum, þarf að laga það. Ef það er eitthvað sem þarf að gera til þess að minnka álag á lögreglufólk með því að auka loks fjárlög til lögreglunnar, þá þarf að gera það," sagði Rósa Björk Brynjólfsdóttir á Alþingi í dag.