Sex fengu milljón á mann

Sex miðaeigendur fengu eina milljón króna í vinning og sautján manns fengu 500 þúsund krónur í útdrætti kvöldsins hjá Happdrætti Háskóla Íslands. Þar að auki fengu þrír miðaeigendur tvö hundruð þúsund krónur.

„Það er óhætt að segja að árið fari vel af stað því heppnum Íslendingum fjölgaði um rúmlega 3.400 í útdrætti kvöldsins,” segir Úlfar Gauti Haraldsson, rekstrarstjóri flokkahappdrættis Happdrætti Háskóla Íslands í tilkynningu.

Heildarupphæð vinninga í útdrætti kvöldsins nam rúmum 98 milljónum og skiptist á 3.421 heppna miðaeigendur.

Milljónaveltan, sem var tíu milljónir króna, gekk ekki út og bætist því við veltu næsta mánaðar sem verður þá 20 milljónir króna.