Þrjátíu og tveir fórust þegar olíuskip sökk

Þrjátíu og tveir fórust þegar olíuflutningaskip sökk undan ströndum Kína í dag. Skipið hefur staðið í ljósum logum eftir að það lenti í árekstri við kínverskt flutningaskip á laugardaginn í síðustu viku en tilraunir til að bjarga áhöfn skipsins báru ekki árangur. Um hundrað þrjátíu og sex þúsund tonn af hráolíu voru um borð í skipinu sem var á leið til Suður Kóreu.

Skipið var staðsett um 260 kílómetra utan af Sjanghæ á austurströnd Kína. Olían um borð var þunnfljótandi olía, léttari útgáfa af hráolíu sem talin er enn hættulegri fyrir umhverfið. Ekki liggur fyrir hvers vegna skipin tvö rákust á.