Sigurgöngu Cleveland Cavaliers lauk í Indiana

Sigurgöngu Cleveland Cavaliers í NBA deildinni lauk í nótt í Indiana þar sem Indiana Pacers hafði betur í jöfnum leik, 106-102. Cavaliers höfðu ekki tapað í síðustu 13 leikjum, en liðið fer niður í 3. sæti austurdeildar NBA eftir tapið. 

Victor Oladipo fór fyrir liði Pacers með 33 stig og 8 fráköst. Var hann sérstaklega drjúgur á lokasprettinum þegar hann setti nokkur mikilvæg skot niður. Pacers eru á mikilli siglingu, hafa unnið níu af seinustu tólf leikjum, og eru fyrsta liðið til að vinna Cavaliers tvisvar á þessu tímabili. 

Lebron James átti sem fyrr góðan leik og var nálægt því að enda leik með þrefalda tvennu; 29 stig, 10 fráköst og átta stoðsendingar. Þá skoraði Kevin Love 20 stig. 

Í San Antonio tryggði Manu Ginobili heimamönnum í Spurs dramatískan sigur á lokasekúndum leiksins gegn Boston Celtics með þriggja stiga körfu, 105-102.

Lamarcus Aldridge var stigahæstur í liði Spurs með 27 stig en Kyrie Irving var stigahæstur að vanda fyrir Boston, með 36 stig. Eftir erfiða byrjun á tímabilinu hefur gengi Spurs snúist við á síðustu vikum og situr liðið í 3. sæti vesturdeildar NBA, á eftir Golden State Warriors og Houston Rockets. 

Warriors mörðu sigur í Detroit gegn heimamönnum í Pistons, 102-98. Kevin Durant fór á kostum í liði Warriors í fjarveru Steph Curry, sem verður frá næstu vikur vegna ökklameiðsla. Endaði hann leik með 36 stig, 10 fráköst, 7 stoðsendingar og 5 varin skot. Ekki amaleg tölfræði það. 

Úrslitin í nótt:

Detroit Pistons - Golden State Warriors: 98-102

Indiana Pacers - Cleveland Cavaliers: 106-102

Orlando Magic - Denver Nuggets: 89-103

Chicago Bulls - Charlotte Hornets: 119-111

New Orleans Pelicans - Sacramento Kings: 109-116

Milwaukee Bucks - Dallas Mavericks: 109-102

Memphis Grizzlies - Toronto Raptors: 107-116

San Antonio Spurs - Boston Celtics: 105-102