NBC rekur Matt Lauer

Bandaríska sjónvarpsstöðin NBC hefur rekið þáttastjórnandann Matt Lauer vegna „óviðeigandi kynferðislegrar hegðunar“. Frá þessu segir á Twitter-síðu stöðvarinnar.

Hinn 59 ára Lauer hefur verið einn þáttastjórnanda The Today Show frá árinu 1994.

Í Twitter-færslunni segir að á mánudagskvöldið hafi stjórnendum stöðvarinnar borist ítarleg kvörtun frá starfsfélaga Lauer þar sem sagt er frá óviðeigandi kynferðislegri hegðun hans á vinnustað.

Ennfremur segir að ekki sé ástæða til að halda að um einangrað tilvik sé að ræða. Stöðin hafi því ákveðið að segja Lauer upp störfum.