Ákærð fyrir að baula á forsetafrú Simbabve

Fjögur voru í gær ákærð fyrir að baula á Grace Mugabe, forsetafrú Simbabve. Atvikið átti sér stað þegar hún flutti ræðu á fundi ZANU-PF, flokks Roberts Mugabe, forseta og eiginmanns hennar.

Í frétt simbabveska blaðsins The Herald segir að hin ákærðu hafi verið handtekin eftir fundinn á laugardag í borginni Bulawayo. Er þeim gefið að sök að hafa reynt að grafa undan valdi forsetans en fjölmiðlar höfðu ekki greint frá því í gær hvort hin ákærðu játuðu sekt.

Talið er að fjórmenningarnir séu stuðningsmenn Emmerson Mnangagwa, fyrrverandi varaforseta sem sækist eftir því að taka við forsetaembættinu þegar Mugabe, nú 93 ára, lætur af störfum. Mnangagwa þessi var rekinn fyrr í vikunni og var ástæðan sögð ótrygglyndi. Hann er nú flúinn til Suður-Afríku.

Hart er barist um að verða eftirmaður Mugabes og er forsetafrúin ein þeirra sem sækjast eftir stólnum. Greindi BBC frá því í gær að hún hafi raunar verið einn helsti hvatamaður þess að Mnangagwa yrði rekinn. Hefur hún meðal annars sagt að Mnangagwa væri „naðra sem þyrfti að slá í höfuðið“.

Nú þegar Mnangagwa hefur verið rekinn þykir Grace Mugabe einna líklegust til að verða næsti forseti Afríkuríkisins.