Ásmundarnir, forsætisráðherra og reynslumesti þingmaðurinn oftast strikaðir út

Oftast var strikað yfir nafn Bjarna Benediktssonar, forsætisráðherra og formanns Sjálfstæðisflokksins, á atkvæðaseðlum í Suðvesturkjördæmi í þingkosningunum á laugardag, eða alls 483 sinnum. Sjálfstæðisflokkurinn hlaut 17.216 atkvæði í kjördæminu sem þýðir að 2,8 prósent kjósenda hans strikuðu Bjarna út.

Í Suðurkjördæmi strikuðu kjósendur oftast yfir nafn Ásmundar Friðrikssonar, þingmanns Sjálfstæðisflokksins, eða alls 377 sinnum.

Kjósendur í Norðausturkjördæmi stirkuðu oftast yfir nafn Steingríms J. Sigfússonar, þingmanns Vinstri grænna sem setið hefur lengst á þingi af þeim sem taka sæti þar nú, eða alls 258 sinnum.

Í Norðvesturkjördæmi var síðan oftast strikað yfir nafn Ásmundar Einars Daðasonar, þingmanns Framsóknarflokksins, eða alls 105 sinnum.

Ekki hafa fengist svör varðandi útstrikanir frá yfirkjörstjórnum í Reykjavíkurkjördæmunum tveimur.

Hér fyrir neðan má hins vegar sjá lista yfir þá þrjá frambjóðendur í hverju landsbyggðarkjördæmi fyrir sig og Suðvesturkjördæmi sem oftast voru strikaðir út.

Suðvesturkjördæmi

1.    Bjarni Benediktsson, Sjálfstæðisflokki – 483 sinnum

2.    Jón Gunnarsson, Sjálfstæðisflokki – 169 sinnum

3.    Þorgerður Katrín Gunnarsdóttir, Viðreisn – 163 sinnum

Suðurkjördæmi

1.    Ásmundur Friðriksson, Sjálfstæðisflokki – 377 sinnum

2.    Páll Magnússon, Sjálfstæðisflokki – 156 sinnum

3.    Vilhjálmur Árnason, Sjálfstæðisflokki – 88 sinnum

Norðausturkjördæmi

1.    Steingrímur J. Sigfússon, Vinstri grænum – 258 sinnum

2.    Kristján Þór Júlíusson, Sjálfstæðisflokki – 57 sinnum

3.    Valgerður Gunnarsdóttir, Sjálfstæðisflokki – 31 sinni

Norðvesturkjördæmi

1.    Ásmundur Einar Daðason, Framsóknarflokki – 105 sinnum

2.    Guðjón Brjánsson, Samfylkingunni – 48 sinnum

3.    Bjarni Jónsson, Vinstri grænum – 40 sinnum