Íslandsbanki skiptir um auglýsingastofu í miðri herferð

Íslandsbanki hefur fært viðskipti sín til auglýsingastofunnar Brandenburg eftir að hafa starfað með ENNEMM auglýsingastofu frá árinu 2011. Bankinn hefur verið í einni sinni umfangsmestu auglýsingaherferð síðastliðnar vikur – sem þó var afar umdeild í fyrstu.

Alls ótengt hörðum viðbrögðum

Guðmundur Arnar Guðmundsson, markaðsstjóri Íslandsbanka, segir þessar breytingar hafa verið í farvatninu í nokkurn tíma. Þær tengist herferðinni umdeildu því ekki á nokkurn hátt.

„Ég tók við sem markaðsstjóri í desember í fyrra og þá fórum við að skoða þessi mál. Þannig að þetta er búið að vera töluvert lengi í vinnslu,“ segir Guðmundur í samtali við Vísi. Markaðsmál hafi verið í endurskoðun frá því að hann hóf störf.

„Það er aldrei góður eða réttur tími til að gera svona. Við erum til dæmis með Reykjavíkurmaraþonið fram undan sem er stærsta verkefni okkar á hverjum ári. En það er bara þannig að það er enginn tími betri en annar í þessum efnum,“ segir hann, aðspurður hvers vegna skipt sé um stofu í miðri herferð.

Áfram svipaðar áherslur

Auglýsingaherferðinni var hrundið af stað með krafti í síðasta mánuði. Hún vakti hins vegar hörð viðbrögð og voru samfélagsmiðlar undirlagðir af myndum þar sem herferðin var skrumskæld. Töldu margir að einfölduð mynd væri dregin upp af erfiðri stöðu ungs fólks.

Guðmundur vill ekki meina að auglýsingarnar hafi verið mistök enda hafi þúsundir leitað ráðgjafar vegna húsnæðismála hjá bankanum í framhaldinu. Næstu skref séu að halda áfram að vekja athygli á húsnæðismarkaðnum en með einhverjum áherslubreytingum.

„Það er verið að endurhugsa markaðsmálin því stórir bankar í dag standa frammi fyrir miklum áskorunum. Það eru aðilar sem eru að koma inn og keppa við mismunandi hluta af starfseminni okkar. Og bankar þurfa að breyta bæði hvernig þeir tala og vinna, þeir þurfa að breyta rödd sinni því bönkum hefur verið tamt að draga upp glansmynd af stöðunni,“ segir Guðmundur.