Seðlabankinn hefði átt að vita af samningaumleitunum Kaupþings

Seðlabankanum hefði átt að vera ljóst að verðmæti hlutar hans í Kaupþingi gæti aukist vegna samninga kröfuhafa Kaupþings í tengslum við vandræðaeignir félagsins. Forsætisráðherra telur eðlilegt að Seðlabankinn upplýsi hvort ákvæði var í samningi bankans um að hann nyti aukins ávinnings á síðari stigum.

Sigurður Ingi Jóhannsson, formaður Framsóknarflokksins, vitnaði á Alþingi í dag í Markað Fréttablaðsins sem greindi hinn 29. mars frá því að skömmu eftir að Seðlabanki Íslands seldi um sex prósenta hlut sinn í Kaupþingi síðast liðið haust til sömu aðila og nýlega keyptu sameiginlega um 29 prósent í Arion banka, hafi verðmæti hlutarins aukist vegna samninga Kaupþings við Deutche Bank upp á um 50 milljarða króna.

„Þar kemur einnig fram að Seðlabankinn segist ekki hafa haft upplýsingar um að viðræður Kaupþings og Deutche Bank stæðu yfir og að slíkt samkomulag hafi verið í undirbúningi. Kaupþing vilji á hinn bóginn ekki staðfesta að slíkt samkomulag hafi legið fyrir í október eða skömmu áður en viðskiptin áttu sér stað,“ sagði Sigurður Ingi.

Í frétt Markaðar Fréttablaðsins í gær kemur síðan fram að í ársfjórðungslegum kynningum Kaupþings á seinni helmingi síðasta árs, meðal annars í kynningu stjórnenda í september sem Markaðurinn hafi undir höndum, hafi félagið verið í „virkum samskiptum“ við meirihluta mótaðila Kaupþings í stórum ágreiningsmálum í því skyni að kanna hvort hægt væri að ljúka þeim með samkomulagi í stað málaferla. Á þeim tíma hafi bókfært virði „vandræðaeigna“ Kaupþings aðeins numið 21 milljarði en nafnvirði krafnanna hins vegar verið yfir 700 milljörðum. Það var því ljóst að hagfelld niðurstaða Kaupþings í stórum ágreiningsmálum gæti aukið umtalsvert endurheimtur hluthafa, eins og reyndin hefur orðið. Ef starfsmenn Seðlabankans hefðu fylgst betur með hefði þeim átt að vera ljóst að verðmæti hlutabréfanna í Kaupþingi gæti aukist.

Formaður Framsóknarflokksins spurði forsætisráðherra því á Alþingi í dag hvort Seðlabankinn, sem heyrir undir hann,  hafi sett leiðréttingarákvæði í samning sinn við Kaupþing, þannig að Seðlabankinn nyti þess ef verðmæti bréfanna ykist á síðari stigum.

„Ég hygg að flestir séu minnugir sölu Landsbankans á hlut í Borgun hér um árið. Ekkert slíkt ákvæði var í sölusamningnum þá og ríkisbankinn varð af umtalsverðum fjárhæðum,“ sagði Sigurður Ingi.

Bjarni Benediktsson forsætisráðherra minnti á að ríkisstjórnin hefði enga beina aðkomu að fjármálagjörningum Seðlabankans. Þar af leiðandi væri honum ekki kunnugt um efni þessara samninga.

„En mér þykir það hins vegar rétt ábending hjá háttvirtum þingmanni að það er sjálfsagt að kalla eftir þessu og fá skýringar,“ sagði forsætisráðherra.

Sigurður Ingi sagði þetta einnig vekja spurningar um sölu Seðlabankans á öðrum eignum.

Erum við að horfast í augu við það að þessir aðilar hafi enn og aftur leikið á íslenska aðila og látið okkur selja eignir á lægra verði en aðrir síðan versla með? Vegna þess að þeir höfðu vitneskju um meira,“ sagði Sigurður Ingi Jóhannsson.