FME getur hafnað hluthöfum Arion leiki vafi á hver er eigandi

Aðstoðarforstjóri Fjármálaeftirlitsins segir FME hafa ríkar heimildir til að rannsaka þá aðila sem keypt hafa tuttugu og níu prósenta hlut í Arion. Heimild sé til að hafna kaupunum reynist vafi á því hverjir eru raunverulegir eigendur á bakvið kaupin.

Fulltrúar Fjármálaeftirlitsins komu á fund efnahags- og viðskiptanefndar Alþingis í dag til að fara yfir söluna á 29 prósenta hlut í Arion banka. Það var greinilegt að nefndarmenn höfðu miklar áhyggjur af orðspori þessara kaupenda.

Lilja Alfreðsdóttir óskaði eftir því að fulltrúar FME kæmu á fund nefndarinnar og sagði að með sölu á hlut í Arion væri verið að stíga stórt skref í endurreisn íslenska bankakerfisins.

„Það sem skiptir mestu máli í þessu ferli sem er framundan er að það ríki gagnsæi á eignarhaldi og hverjir endanlegir fjárfestar eru í bankanum. Ég myndi segja að það væri í fyrsta lagi og svo í örðu lagi hvernig kaup þessara apila eru fjármögnuð og til hversu langs tíma,“ sagði Lilja meðal annars.

Katrín Jakobsdóttir formaður Vinstri grænna spurði hversu náið FME gæti kannað bakgrunn hluthafanna.

„Þá langar mig bara að spyrja, hérna er um að ræða fyrirtæki sem þarf svo sem ekkert mikla rannsókn á að hafa ekkert sérstaklega gott orðspor þegar kemur að spillingarmálum. Þegar kemur að ýmsu öðru sem eru hlutar af þessu teymi. Ég er náttúrlega að vísa í Och-Ziff og Goldman Sachs sem hafa kannski ekki verið þekkt fyrir heilbrigða viðskiptahætti. Það hefur verið bent á að hluti af eignarhaldinu megi rekja til skattaskjóla,“ sagði Katrín.

Logi Einarsson formaður Samfylkingarinnar óttast gamla drauga frá því fyrir hrun.

„Hverjar eru líkurnar á að hægt sé að komast að því á endanum hverjir raunverulegir eigendur eru? Og hvaða áhrif það hefur á þá möguleika þegar slóð eignarhaldsins endar jafnvel á Panama, Cayman eyjum eða einhvers staðar. Og hvort verður einhvern tíma hægt að útiloka að þekktir leikendur í síðasta bankahruni eða góðkunningjar úr panamaskjölunum frá því síðasta vor séu á einhvern hátt tengdir þessum sjóðum,“ sagði Logi.

Þetta eru dæmi um hugleiðingar þingmanna en fleiri fulltrúar flokka í efnahags- og viðskiptanefnd spurðu fulltrúa FME út úr.

Jón Þór Sturluson aðstoðarforstjóri FME sagði þá fjóra aðila sem keypt hefðu 29 prósenta hlut hafa lýst yfir að þeir hyggðust nýta kauprétt til frekari kaupa, sem þýddi að þeir yrðu virkir hluthafar. FME kanni engu að síður hvort þeir kunni nú þegar að vera virkir hluthafar vegna tengsla og hafi sett mörk á hve langur tími megi líða þar til þeir auki hlut sinn. Orðspor bæði sjóðanna og einstakra eigenda þeirra væri eitt af því sem skipti máli við mat á þeim.

„Við höfum ríkar heimildir til að ganga úr skugga um hverjir eru eigendur þessa banka. Það eru lagaákvæði sem segja að okkur sé heimilt að hafna aðila um að fara með virkan eignarhlut leiki á því vafi hver sé raunverulegur eigandi,“ sagði Jón Þór.