Guðmundur sendi Vísi pillu í athugasemdakerfi

Guðmundur Guðmundsson virtist ekki ánægður með orðalag fréttar sem birtist á Vísi í gær og lét vita af sér í athugasemdakerfinu við fréttina.

Sjá einnig: Svíarnir hans Kristjáns rúlluðu yfir Katar og tryggðu Guðmundi sigur í riðlinum

Katar var fyrir leikinn gegn Svíum í gær eina liðið sem átti möguleika á að ná efsta sæti D-riðils af Dönum. En eftir sigur Svía á Katar í gær var ljóst að Danir eru öruggir með efsta sæti riðilsins, eins og sagt er frá í fréttinni.

Guðmundur Guðmundsson er þjálfari danska landsliðsins og gerði liðið að Ólympíumeisturum í sumar.

„Danir höfðu sem sagt ekkert um það að segja að vinna riðilinn. Þeir hafa unnið alla 4 leiki sína til þessa og þeir unnu einnig svía. Því það voru svíar sem unnu riðilinn fyrir dani, einmitt,“ skrifaði Guðmundur í umræddri athugasemd.

Danmörk vann Barein í gær, 30-26, og er í fríi í dag. Danir mæta svo Katar á morgun í lokaumferð riðlakeppninnar.

Vísir stendur við upphaflegu frétt sína og orðalag hennar.