Þrenna hjá Harden í þriðja tapi Spurs á heimavelli í röð | Myndbönd

James Harden, leikstjórnandi Houston Rockets, fór á kostum þegar liðið vann flottan tveggja stiga sigur á San Antonio Spurs á útivelli, 101-99. Harden bauð upp á þrennu í leiknum.

Þessi magnaði leikmaður skoraði 24 stig, tók tólf fráköst og gaf fimmtán stoðsendingar en hann hitti úr níu af 19 skotum sínum en þó ekki nema einu af fimm fyrir utan þriggja stiga línuna.

Kawhi Leonard var stigahæstur hjá Spurs með 34 stig auk þess sem hann tók sjö fráköst. Þetta var þriðja tap San Antonio í röð á heimavelli sem þykir saga til næsta bæjar en Spurs-liðið er vanalega eitt það allra erfiðasta heim að sækja.

Klay Thompson kom Golden State í gang gegn Dallas Mavericks er silfurlið síðustu leiktíðar vann annan leikinn í röð í eildinni, 116-95. Thompson hitti úr sjö fyrstu skotunum sínum og skoraði 18 af 20 stigum sínum í fyrsta leikhluta.

Kevin Durant var stigahæstur með 28 stig auk þess sem hann tók tíu fráköst en Steph Curry skoraði 24 stig og hitti úr fjórum af átta fyrir utan þriggja stiga línuna.

Eftir fjóra sigurleiki í röð tapaði Oklahoma City Thunder í nótt fyrir Toronto Raptors á útivelli, 112-102. Russell Westbrook fór á kostum sem fyrr og skoraði 36 stig auk þess sem hann tók sjö fráköst og gaf sjö stoðsendingar.

Úrslit næturinnar:

New York Knicks - Brooklyn Nets 110-96

Washington Wizards - Boston Celtics 118-93

Charlotte Hornets - Utah Jazz 104-98

Orlando Magic - Minnesota Timberwolves 107-123

Indiana Pacers - Philadelphia 76ers 122-115

Atlanta Hawks - Chicago Bulls 115-107

OKC Thunder - Toronto Raptors 102-112

Phoenix Suns - Detroit Pistons 107-100

San Antonio Spurs - Houston Rockets 99-101

LA Clippers - Portland Trail Blazers 111-80

Golden State Warriors - Dallas Mavericks 116-95