Miklu minna um skvettur hjá Skvettubræðrum í vetur

Golden State Warriors vann í fyrravetur fleiri leiki en nokkurt annað lið í NBA-sögunni og fékk síðan til sín einn besta leikmann deildarinnar í sumar. Breytingarnar eru ekki að hafa góð áhrif á Skvettubræðurna.

Golden State Warriors liðið fékk þrjá leiki þar sem einn sigur tryggði þeim NBA-titilinn annað árið í röð en þrjú töp í röð í lokaúrslitunum þýddi að Warriors-menn misstu titilinn til Cleveland Cavaliers.

Pressan var mikil á Golden State liðinu fyrir tímabilið og gagnrýnisraddirnar voru fljótar að koma fram eftir stórtap á móti San Antonio Spurs í fyrsta leik.

Golden State hefur reyndar unnið 4 af fyrstu 6 leikjum sínum en flestir sigranna hafa verið ósannfærandi. Sá sem stendur örugglega upp úr er þegar liðið endaði sigurgöngu Oklahoma City Thunder þar sem Kevin Durant fór á kostum á móti sínum gömlu félögum.

Margir benda á tölfræðisamanburð á Skvettubræðrunum Steph Curry og Klay Thompson. Það er rosalegur munur á þeim í fyrstu sex leikjunum í ár miðað við fyrstu sex leikina í fyrra.

Það var ekki að hjálpa þeirri tölfræði að Steph Curry klikkaði á öllum tíu þriggja stiga skotunum sínum í síðasta leik.

Samanlagt voru þeir Steph Curry og Klay Thompson með 50,0 stig að meðaltali í leik í fyrstu sex leikjunum á síðasta tímabili. Þeir eru „bara“ með 39,0 stig í leik í ár.

Steph og Klay voru með 45 þrista saman og 47 prósent þriggja stiga skotnýtingu í fyrstu sex leikjunum í fyrra en Golden State vann þá alla. Nú hafa þeir skorað 17 færri þrista og nýtingin þeirra saman er aðeins 28 prósent fyrir utan þriggja stiga línuna.

Kevin Durant er stigahæstur í Golden State Warriors liðinu það sem af er með 30,0 stig að meðaltali í leik. Innkoma Durant ætti að skýra færri stig en ekki verri nýtingu. Þar kemur örugglega meira inn taktur, taktík og skotstaðir þeirra á vellinum. Pressan á þeim er heldur ekki til að létta þeim lífið.

Það er hægt að sjá umfjöllun nba.com um vandræðin hjá Skvettubræðrum hér.

Stephen Curry er með 23,2 stig og 6,0 stoðsendingar í leik en hefur aðeins hitt úr 35 prósent þriggja stiga skota sinna. Curry var með 30,1 stig, 6,7 stoðsendingar og 45,4 prósent þriggja stiga nýtingu í fyrravetur.

Klay Thompson er hinsvegar aðeins með 19,6 prósent þriggja stiga nýtingu en hann hefur skorað 15,8 stig að meðaltali í leik. Klay var með 22,1 stig og 42,4 prósent þriggja stiga nýtingu á síðasta tímabili.

Næsti leikur Golden State Warriors fer fram í nótt þegar liðið tekur á móti New Orleans Pelicans í Oakland. Leikurinn hefst klukkan 3.30 að íslenskum tíma.