Kaffitár og Rammagerðin annast verslun og veitingasölu í nýrri Perlu

Kaffitár og Rammagerðin munu annast veitingasölu og verslun í Perlunni eftir breytingar vegna náttúrusýningarinnar sem verður sett upp þar. Samningar hafa náðst milli Perlu norðursins, Kaffitárs og Rammagerðarinnar þess efnis. Fyrri hluti sýningarinnar opnar í byrjun sumars 2017 og hefjast verslunin og veitingasalan á sama tíma. Þetta kemur fram í fréttatilkynningu.

Gert er ráð fyrir að veitingastaður, kaffihús og verslun leggi undir sig fjórðu, fimmtu og sjöttu hæð Perlunnar og mun gestum gefast tækifæri á að fara út á útsýnispallinn líkt og nú tíðkast.

Aðalheiður Héðinsdóttir, stjórnarformaður og stofnandi Kaffitárs segir fyrirtækið hlakka til að taka þátt í nýrri Perlu. „Ný Perla er metnaðarfullt verkefni í alla staði, sem við hlökkum til að taka þátt í,” segir Aðalheiður. Hún segir að kaffihúsið verði með vísan í náttúrusýninguna og að áhersla verði lögð á fjölbreytileika í takt við hana.

„Við munum þar með auka vöruúrvalið okkar í takt við sýninguna og til að mynda verður boðið upp á bjór og ís sem verður sérframleiddur fyrir okkur.”

Rammagerðin mun annast verslun í Perlunni, en fyrirtækið vinnur með um fjögur hundruð íslenskum hönnuðum og handverksfólki. Lovísa Óladóttir, framkvæmdastjóri Rammagerðarinnar, tekur í sama streng og Aðalheiður og segist spennt fyrir að taka þátt í nýrri Perlu.

„Það er spennandi að fá að taka á móti fólkinu. Við sjáum fyrir okkur að bjóða upp á íslenska gestrisni eins og hún gerist best og vísa þar í sveitasæluna. Hafa þetta eins og þegar fólk var að koma í sveitina í gamla daga, þá var tekið vel á móti og við erum sannarlega tilbúin að taka á móti gestunum,” segir Lovísa.

Samkvæmt Agnesi Gunnarsdóttur, framkvæmdastjóra Perlu norðursins, verður Perlan afhent nýjum rekstraraðilum í janúar og þá hefjist framkvæmdir við náttúrusafn og veitinga- og verslunarrými. Perlan mun ekki loka á meðan á framkvæmdum við sýninguna stendur.