Óttast að gulusótt verði heimsfaraldur

Alþjóðlegu góðgerðarsamtökin Save the Children vara við því að gulusótt gæti orðið heimsfaraldur.

Samtökin segja nýjasta faraldur gulusóttar hafa breiðst hratt um Austur-Kongó og Angóla. Faraldurinn gæti brátt breiðst út til Ameríku, Asíu og Evrópu sé hann ekki stöðvaður. Á þessu ári hafa 400 manns látist úr gulusótt í löndunum tveimur.

Save the Children hóf því í gær verkefni í samstarfi við heilbrigðisráðuneyti Austur-Kongó þar sem farið verður til Kinshasa, höfuðborgar landsins, til að bólusetja fjölda manns.

Heilbrigðisstofnun Sameinuðu þjóðanna hefur einnig lagst í sams konar verkefni. Mun hún vinna með heilbrigðisráðuneytum Austur-Kongó og Angóla við að bólusetja rúmlega fjórtán milljónir manna í átta þúsund bæjum og borgum á svæðinu.

„Engin lækning þekkist við gulusótt og hún gæti orðið að heimsfaraldri. Bólusetningarherferðin í Kinshasa þarf að gerast núna svo við getum stöðvað gulusótt áður en hún dreifist um allan heim,“ sagði Heather Kerr, forstöðumaður Save the Children í Austur-Kongó.

Gulusótt er tilkynningaskyldur sjúkdómur til sóttvarnalæknis á Íslandi og telst geta ógnað almannaheill..