Þjálfari Conors opnar sig: „Hann mætti of seint á æfingu og sagðist vera hættur“ | Myndband

John Kavanagh, þjálfari Conors McGregors og Gunnars Nelson, var í viðtali í þættinum The MMA Hour sem fremsti MMA-blaðamaður heims, Ariel Helwani, sér um á Fox Sports.

Kavanagh sagði þar í fyrsta sinn frá sinni upplifun af síðustu viku þegar hans frægasti skjólstæðingur, Conor McGregor, sagðist vera hættur en gríðarlegur fjölmiðlastormur myndaðist eftir það og er hann ekki hættur.

Sjá einnig:Segir dauðsfallið hafa mikil áhrif á ákvörðunina

Conor mætti ekki á blaðamannafund í Las Vegas síðastliðinn föstudag sem varð til þess að Dana White, forseti UFC, tók hann af UFC 200 bardagakvöldinu þar sem hann átti að berjast öðru sinni við Nate Diaz.

Conor sagði svo á Twitter í fyrradag að búið væri að ganga frá málum og þakkaði Dana White fyrir að gera stuðningsmönnunum þann greiða að endurvekja bardaga hans og Nate Diaz. Það var bara bull hjá Conor því White var ekki búinn að því og er nú leitað að öðrum aðalbardaga á UFC 200.

Misbrestur í samskiptum

Conor, Kavanagh og Gunnar Nelson yfirgáfu Ísland í gær eftir vikudvöl og héldu til Írlands þar sem Gunnar verður í viku í æfingabúðum áður en hann heldur til Rotterdam. Kavanagh varð viðskila við Conor í smá tíma og vissi ekki af tístinu um að bardaginn væri aftur orðinn að veruleika.

„Ég vissi ekki af þessu og ekki heldur umboðsmaður hans þannig þetta voru fréttir fyrir okkur. Ég hef ekki talað við Conor síðan því ég hef eytt deginum með Paddy Hoolahan og er að koma Gunna fyrir,“ segir Kavanagh.

Sjá einnig:Diaz: Fer í frí ef ég berst ekki við Conor

Aðspurður hvernig andrúmsloftið var þegar hann síðast hitti Conor sagði Kavanagh: „Hann var jákvæður um að það væru góðar fréttir á leiðinni og ég sá frétt á ESPN um að hann væri kominn aftur á bardagakvöldið. Þetta er held ég að þokast í rétta átt.“

Honum finnst skrýtið að Conor og UFC standi í þessari baráttu þar sem samstarf þeirra hefur gengið svo vel.

„Já, ég verð að segja það. Kannski voru þetta bara misbrestir í samskiptum. Það hefði kannski þurft betri samtöl á milli beggja aðila. Það hefði verið hægt að ræða saman á Skype eða eitthvað. Ég veit ekki hvað málið er alltaf með Vegas og þurfa að vera þar. UFC er alþjóðlegt, hlutirnir gerast ekki bara í Vegas,“ sagði írski bardagaþjálfarinn.

„Ég skil ekki hvers vegna menn þurfa alltaf að koma þangað, sérstaklega þegar bardagamaður sem er að hefja tólf vikna æfingaprógram þarf að rugla því til að fljúga til Vegas.“

„Ég vona að vegna alls þess sem Conor hefur gert; tekið að sér bardaga með skömmum fyrirvara og aflað svona mikilla tekna, að þetta gangi upp þó hann hafi ekki mætt á einn blaðamannafund,“ sagði Kavanagh.

Var ekkert grín

Helwani fór með Kavanagh á byrjunarreitinn. Tístið sem tryllti heiminn. Tístið frá Conor þar sem hann sagðist vera hættur þetta ungur að aldri, aðeins 27 ára. Írinn var þá staddur á Íslandi og skrifaði Twitter-færsluna rétt áður en hann fór á æfingu.

„Ég var að þjálfa hjá Mjölni á Íslandi og hann mætir of seint á æfingu. Ég segi honum að drífa sig á mottuna en áður en við byrjum segir hann: „Heyrðu, ég er hættur.“ Ég sagði bara allt í lagi og að við myndum ræða þetta eftir æfinguna,“ sagði Kavanagh.

Sjá einnig:Sjáðu Conor og Gunnar takast á í frábæru myndbandi | Myndband

„Við æfðum í nokkra tíma og svo fór ég út og kveikti á símanum og sá að hann var búinn að tísta þessu. Hann var sáttur að hætta á þessum tímapunkti. Þetta var ekkert grín.“

„Stundum þarf ég vera handbremsan í ákvarðanatökum hans þannig við áttum samtal um þetta þar sem ég reyndi að fá hann af því að hætta. Mér fannst þetta aðeins of mikil fjótfærni en það er hluti af því sem gerir hann að snillingi og manni sem er áhugavert að fylgjast með,“ sagði Kavanagh.

Skipti um símanúmer

Áhuginn á Conor McGregor út um allan heim er svakalegur en fjölmiðlaumfjöllun um málið hefur verið gríðarleg. Svo mikil að John Kavanagh þurfti að skipta um símanúmer sem hann er búinn að vera með í rúman áratug.

„Þegar þú reyndir að hringja í mig gastu það ekki því ég þurfti að skipta um símanúmer. Ég er búinn að vera með sama númerið í fimmtán ár en ég þurfti að skipta því áreitið var svo mikið,“ sagði hann.

Sjá einnig:Viljið þið blaðamannafundi eða bardaga?

„Þú ert fyrsti blaðamaðurinn og verður sá eini sem hefur nýja númerið mitt. Í gegnum árin lætur maður hina og þessa fá númerið en svo komst ég að því að svona 200 blaðamenn voru komnir með númerið. Síminn bara hringdi og hringdi þar til hann varð batteríslaus. Svo hlóð ég hann og þá gerðist þetta aftur.“

„Ég varð að hringja í símafyrirtækið mitt og fá nýtt númer sem er nú vanalega ekki gert en sá sem talaði við mig áttaði sig á hver ég var og skildi aðstöðuna sem ég var kominn í. Ég fékk því nýtt númer sem aðeins tíu manns eru með,“ sagði John Kavanagh.

Viðtalið við John Kavanagh hefst eftir átta mínútur í þættinum