Houston síðasta liðið inn í úrslitakeppni NBA | Liðin sem mætast

James Harden og félagar í Houston Rockets voru í nótt sextánda og síðasta liðið sem tryggði sér sæti í úrslitakeppni NBA-deildarinnar í körfubolta en Houston hafði betur í baráttunni við Utah Jazz um síðasta sætið í Vesturdeildinni.

Úrslitakeppni NBA-deildarinnar hefst síðan strax á laugardaginn en fyrsti leikurinn verður á milli Toronto Raptors og Indiana Pacers. Strax á eftir spila síðan Golden State Warriors og Houston Rockets en hinir leikir fyrsta dagsins eru á milli Atlanta Hawks og Boston Celtics annarsvegar og Oklahoma City Thunder og Dallas Mavericks hinsvegar. Allar hinar viðureignirnar fara síðan í gang á sunnudaginn.

James Harden skoraði 38 stig fyrir Houston í 116-81 sigri á Sacramento en liðið var komið með tuttugu stiga forystu í hálfleik, 66-44. Houston þurfti bara að treysta á sig en af því að Utah Jazz tapaði sínum leik þá hefði liðið komist í úrslitakeppnina hvort sem er.

Houston mætir liði Golden State Warriors í fyrstu umferðinni sem Golden State setti nýtt met með því að vinna 73 sigurleikinn sinn í lokaleiknum sínum.

Nýliðarnir Boban Marjanovic og Jonathon Simmons fóru fyrir útisigri San Antonio Spurs á Dallas Mavericks 96-91 en það truflaði ekki Spurs-liðið að fjórir byrjunarliðsmenn og tveir aðrir sterkir leikmenn til viðbótar fóru ekki með til Dallas.

Boban Marjanovic og Jonathon Simmons settu báðir nýtt persónulegt met, Serbinn Boban Marjanovic var með 22 stig og 12 fráköst og Jonathon Simmons skoraði 19 stig.

Detroit Pistons og Cleveland Cavaliers hituðu upp fyrir seríu sína með æsispennandi leik í Cleveland en á endanum var það lið Detroit Pistons sem vann 112-110 eftir framlengingu. LeBron James lék ekki með Cleveland í leiknum en liðið hvíldi flesta af sínum lykilmönnum.

Liðin mætast í fyrstu umferð Austurdeildarinnar því Cleveland var með bestan árangur í Austrinu en Detroit varð í áttunda sæti.

Hér fyrir neðan má sjá hvaða lið mætast í úrslitakeppninni í ár.

- Úrslitakeppni NBA 2016 -

Átta liða úrslit Austurdeildarinnar:

(1) Cleveland Cavaliers - (8) Detroit Pistons

(2) Toronto Raptors - (7) Indiana Pacers

(3) Miami Heat - (6) Charlotte Hornets

(4) Atlanta Hawks - (5) Boston Celtics

Átta liða úrslit Vesturdeildarinnar:

(1) Golden State Warriors - (8) Houston Rockets

(2) San Antonio Spurs - (7) Memphis Grizzlies

(3) Oklahoma City Thunder - (6) Dallas Mavericks

(4) Los Angeles Clippers - (5) Portland Trail Blazers