Golden State vann skyldusigur á lélegasta liði deildarinnar

Golden State Warriors vann í nótt skyldusigur á Philadelphia 76ers á heimavelli en þetta var 35. sigur liðsins í röð á heimavelli á þessu tímabili.

Golden State hefur unnið 66 leiki af 73 og stefnir þessa dagana á að bæta með Chicago Bulls frá árinu 1996 þegar Bulls-liðið vann 72 leiki, met sem stendur enn í dag tuttugu árum síðar.

Var því hægt að tala um skyldusigur fyrir eitt besta lið deildarinnar gegn því lélegasta en gestunum tókst að halda í við Golden State á upphafsmínútum leiksins.

Í öðrum leikhluta settu heimamenn hinsvegar í gír og náðu sextán stiga forskoti en eftir það var sigurinn aldrei í hættu og lauk leiknum með 12 stiga sigri Golden State.

Klay Thompson var stigahæstur í liði heimamanna með 40 stig en þetta var annar leikurinn í röð sem hann endaði með 40 stig.

Draymond Green lauk leiknum með þrefalda tvennu, 13 stig, 11 stoðsendingar og 11 fráköst en besti leikmaður deildarinnar, Steph Curry, hafði hægt um sig með 20 stig.

Þá tryggði Los Angeles Clippers sæti sitt í úrslitakeppninni með 105-90 sigri á Denver Nuggets á heimavelli í gær. Liðið lék áfram án Blake Griffin sem tekur þessa dagana út leikbann en hann er að stíga upp úr meiðslum eftir að hafa ráðist á einn af starfsmönnum liðsins.

Clippers setti Griffin í fjögurra leikja bann eftir að í ljós kom að hann meiddist á hönd við að lemja starfsmann Clippers-liðsins eftir tapleik liðsins í Toronto. Hefur hann ekki tekið þátt í leik með liðinu undanfarna tvo mánuði.

DeAndre Jordan átti enn einn stórleikinn í gær en hann var stigahæstur í liði með Los Angeles Clippers með 16 stig ásamt því að taka 16 fráköst og verja 6 skot.

Hér fyrir neðan má sjá helstu tilþrif kvöldsins og öll úrslit leikjanna í nótt.

Úrslit kvöldsins:

Los Angeles Clippers 105-90 Denver Nuggets

Indiana Pacers 104 -101 Houston Rockets

Sacramento Kings 133-111 Dallas Mavericks

Golden State Warriors 117-105 Philadelphia 76ers

Los Angeles Lakers 88-101 Washington Wizards

Bestu tilþrif gærkvöldsins: Klay var funheitur í nótt: Paul George hafði betur gegn Harden: