San Antonio áfram með 100% árangur á heimavelli | Myndbönd

Átta leikir fóru fram í NBA-deildinni í körfubolta í nótt.

Sigurganga San Antonio Spurs á heimavelli heldur áfram en í nótt vann liðið 10 stiga sigur, 104-94, á Sacramento Kings.

Sterka leikmenn vantaði í lið San Antonio en það virtist ekki breyta neinu. Liðið hefur nú unnið alla 30 leiki sína á heimavelli á tímabilinu.

Kawhi Leonard var atkvæðamestur í liði San Antonio með 25 stig og 13 fráköst. DeMarcus Cousins fór fyrir liði Sacramento með 31 stigi og níu fráköstum.

LeBron James skoraði 28 stig þegar Cleveland Cavaliers bar sigurorð af Boston Celtics, 120-103, á heimavelli.

Átta leikmenn Cleveland skoruðu 10 stig eða meira í leiknum í nótt. Isiah Thomas var sem fyrr stigahæstur í liði Boston með 27 stig.

Þá vann Atlanta Hawks góðan sigur á Los Angeles Clippers á útivelli, 97-107.

Jeff Teague var stigahæstur í liði Atlanta með 22 stig en Paul Millsap kom næstur með 20 stig, auk þess sem hann tók 18 fráköst.

Allir fimm byrjunarliðsmenn Clippers skoruðu 10 stig eða meira. DeAndre Jordan og Chris Paul voru þeirra stigahæstir með 17 stig hvor.

Úrslitin í nótt:

San Antonio 104-94 Sacramento

Cleveland 120-103 Boston

LA Clippers 97-107 Atlanta

NY Knicks 102-89 Detroit

Washington 99-100 Indiana

New Orleans 94-106 Utah

Minnesota 132-118 Brooklyn

Chicago 108-100 Houston

Paul George skoraði 38 stig í sigri Indiana Flottustu tilþrif næturinnar