Einn versti sársauki sem ég hef fundið fyrir

Glímukappinn Gunnar Gústav Logason lenti í skelfilegum meiðslum á bikarglímu Íslands. Sköflungurinn gaf sig. Gunnar var að glíma við Ásmund Hálfdán Ásmundsson er hann brotnaði illa.

Ekki er algengt að keppendur meiðist alvarlega á glímumótum. Menn og konur hafa farið úr axlarlið en síðasta beinbrot kom í Íslandsglímunni árið 1994.

„Heilsan er bara nokkuð góð. Ég er kominn heim,“ segir Gunnar Gústav í samtali við Vísi í morgun.

„Ég lendi svona vitlaust á fótinn. Sný upp á hann og það brotnar stóra beinið í sköflungnum. Það brotnaði í spíral. Það er kominn teinn inn í beinmerginn og svo bolta hann við.“

Það var skelfilegt að sjá sköflunginn brotna eins og sjá má hér í myndskeiði frá RÚV. Myndbandið er ekki fyrir viðkvæma.

„Þetta var frekar sársaukafullt. Þetta er einn versti sársauki sem ég hef fundið fyrir. Það var mjög sérstakt að sjá þetta í fréttunum áður en ég fór í aðgerðina. Ég upplifði þetta nefnilega allt öðruvísi. Ég hélt að hann hefði dottið ofan á mig. Ég skildi ekki hvernig ég gat brotið mig sjálfan svona.“

Gunnar Gústav má ekki hreyfa sig næstu tvær vikurnar. Hann þarf svo að bíða í að minnsta kosti fjóra mánuði eftir því að fara að æfa á ný.

„Ég er í skóla og vinnu. Svo er ég bæði að þjálfa og æfa júdó. Ég er líka í jiu jitsu og fleira. Það verður ekki auðvelt að hvíla og líklega með því erfiðasta sem ég hef gert lengi. Ég á enn eftir að finna út úr því hvernig ég muni drepa tímann.“

Hér má svo sjá úrslitin úr bikarglímunni 2016.