Meistararnir sluppu með skrekkinn gegn lélegasta liði deildarinnar

Golden State Warriors lenti í miklu basli gegn Philadelphia 76ers á útivelli í kvöld en náði að lokum að vinna þriggja stiga sigur.

Áttu flestir von á því að Golden State sem var búið að vinna 42 af fyrstu 46 leikjunum myndi einfaldlega keyra yfir leikmenn Philadelphia 76ers sem höfðu aðeins unnið 7 leiki af 47.

Leikmönnum 76ers tókst að vinna upp tólf stiga forskot Golden State í fjórða leikhluta og jafna metin skömmu fyrir leikslok en Harrison Barnes tryggði Golden State sigurinn með þriggja stiga körfu undir lok leiksins.

Klay Thompson var stigahæstur í liði Golden State með 32 stig, Stephen Curry bætti við 23 stigum en Draymond Green var nálægt því að ná enn einni þreföldu tvennunni með 10 stig, 13 fráköst og 9 stoðsendingar.

Í Cleveland sendu LeBron James og félagar í Cavaliers út sterk skilaboð til deildarinnar með öruggum sigri á San Antonio Spurs.

Mikið hefur verið fjallað um ástandið á Cleveland eftir að þjálfari liðsins var rekinn á dögunum þrátt fyrir að vera með liðið í efsta sæti Austurdeildarinnar.

Leikmenn Cavaliers voru einfaldlega skrefinu á undan allan leikinn og tóku sautján stiga forskot inn í hálfleik og unnu að lokum sannfærandi fjórtán stiga sigur 117-103.

Stjörnurnar þrjár hjá Cleveland, LeBron James, Kyrie Irving og Kevin Love, skiluðu allir yfir 20 stigum annan leikinn í röð en hjá San Antonio Spurs var Kawhi Leonard stigahæstur með 24 stig.

Bestu tilþrif kvöldsins má sjá hér fyrir neðan og stöðuna í deildinni má sjá hér.

Úrslit kvöldsins:



Philadelphia 76ers 105-108 Golden State Warriors

Toronto Raptors 111-107 Detroit Pistons

New Orleans Pelicans 105-103 Brooklyn Nets

Houston Rockets 122-123 Washington Wizards

Memphis Grizzlies 121-117 Sacramento Kings

Cleveland Cavaliers 117-103 San Antonio Spurs

Bestu tilþrif kvöldsins: Harrison Barnes setur sigurkörfuna gegn 76ers: Harden átti sannkallaðan stórleik: