Hefð fyrir því að kveðja þjóðina með sigri

Íslenska handboltalandsliðið er á leiðinni á HM í Katar en fyrsti leikurinn á heimsmeistaramótinu er eftir aðeins ellefu daga. Í kvöld spilar liðið seinni æfingaleikinn á móti Þýskalandi sem er jafnframt síðasti heimaleikur liðsins fyrir Katarförina.

Íslenska liðið tapaði með sjö marka mun á móti Þjóðverjum í fyrri leik þjóðanna í gær, 24-31, eftir að hafa komist í 5-1 í byrjun leiks. Þýska liðið hafði mikla yfirburði í seinni hálfleiknum og íslenska liðið á mikið verk fyrir höndum á næstu dögum ætli liðið að koma sér í rétta HM-gírinn.

Strákarnir okkar hafa haldið í þá hefð undanfarin átta ár að kveðja alltaf íslensku þjóðina með sigurleik. Sú hefur verið raunin í sjö síðustu skipti þar sem íslenska handboltalandsliðið hefur spilað heimaleik í lokaundirbúningi sínum fyrir HM, ÓL eða EM. Það reynir á þessa hefð í seinni leiknum við Þýskaland í kvöld.

Íslenska landsliðið spilaði ekki heimaleik fyrir EM í Danmörku á síðasta ári en vann síðasta heimaleikinn fyrir öll stórmót sín frá 2007 til 2013.

Það þarf að fara allar götur til ársbyrjunar 2006 til að finna tapleik í síðasta heimaleik liðsins fyrir stórmót. Íslenska liðið tapaði þá tveimur síðustu heimaleikjum sínum fyrir EM í Sviss. Mótherjarnir voru reyndar ekki af verri endanum því þar fóru verðandi Evrópumeistarar Frakka sem unnu nokkrum vikum síðar undan- og úrslitaleikinn á EM með samtals fjórtán mörkum.

Frá aldamótum hefur íslenska liðið aðeins tvisvar kvatt þjóðina með tapi en tíu sinnum hefur síðasti heimaleikurinn unnist. Hér til hliðar má sjá síðustu heimaleiki liðsins fyrir undanfarin stórmót.

Síðustu heimaleikir íslenska handboltalandsliðsins fyrir stórmót:

Hér er átt við síðasta heimaleik íslenska landsliðsins í lokaundirbúningi liðsins fyrir stórmót.

EM 2014: Enginn heimaleikur

HM 2013: 34-24 sigur á Túnis

EM 2012: 43-25 sigur á Finnlandi

HM 2011: 31-27 sigur á Þýskalandi

EM 2010: 37-27 sigur á Portúgal

ÓL 2008: 35-26 sigur á Spáni

EM 2008: 32-30 sigur á Tékklandi

Hm 2007: 34-32 sigur á Tékklandi

EM 2006: 30-36 tap fyrir Frakklandi

HM 2005: Enginn heimaleikur

EM 2004: Enginn heimaleikur

EM 2004: 31-22 sigur á Sviss

HM 2003: 25-32 tap fyrir Slóveníu

EM 2002: 28-24 sigur á Þýskalandi

HM 2001: 34-10 sigur á Bandaríkjunum

Samtals 2001-2014: 10 sigrar í 12 leikjum