NBA: San Antonio Spurs búið að vinna alla sextán heimaleiki sína | Myndbönd

San Antonio Spurs vann sinn 21. leik á NBA-tímabilinu með tíu stigum eða meira, Atlanta Hawks vann sinn fjórða sigur í röð, James Harden leiddi Houston til þriðja sigursins í röð og Kevin Durant skoraði sigurkörfu Oklahoma City Thunder á móti Los Angeles Clippers 5,9 sekúndum fyrir leikslok.

Kawhi Leonard var með 24 stig þegar San Antonio Spurs vann 106-92 sigur á Indiana Pacers en Spurs-liðið hefur þar með unnið alla sextán heimaleiki sína á þessu tímabili og alls 24 af 29 leikjum sínum. Þetta var jafnframt 21. sigur liðsins með tíu stigum eða meira. Tony Parker var með fimmtán stig í sjötta sigri liðsins í röð. George Hill og Jordan Hill skoruðu báðir 15 stig fyrir Indiana.

Kevin Durant skoraði sigurkörfu Oklahoma City Thunder 5,9 sekúndum fyrir leikslok í 100-99 útisigri á Los Angeles Clippers. Durant varði síðan lokaskot Chris Paul. Liðin skiptust fjórum sinnum um að hafa forystuna á síðustu 40 sekúndum leiksins. Russell Westbrook var með 33 stig og 7 stoðsendingar en Kevin Durant skoraði 24 stig, tók 9 fráköst og gaf 7 stoðsendingar. Chris Paul skoraði 32 stig og gaf 10 stoðsendingar og þeir Blake Griffin og J.J. Redick voru með 15 stig hvor.

Dennis Schröder skoraði 18 stig á 17 mínútum þegar Atlanta Hawks vann 106-97 sigur á Portland Trail Blazers en þetta var fjórði sigurleikur liðsins í röð. Sex leikmenn Atlanta skoruðu tíu stig eða meira en Portland lék án Damon Lillard og C.J. McCollum og tapaði sínum fjórða leik í röð. Lillard missti af sínum fyrsta leik á ferlinum en hann var búinn að spila 275 leiki í röð.

James Harden skoraði 36 stig í 102-95 heimasigri Houston Rockets á Charlotte Hornets en þetta var þriðji sigur liðsins í röð. Harden skoraði körfu og fékk víti að auki 31,6 sekúndum fyrir leikslok og kom Houstin þá í 94-91. Leikurinn kláraðist síðan á vítalínunni en Harden hitti úr 16 af 19 vítum sínum.

Brook Lopez var með 21 stig og 12 fráköst þegar Brooklyn Nets endaði fimm leikja taphrinu með 105-102 útisigri á Chicago Bulls. Thaddeus Young bætti við 16 stigum og 13 fráköstum.  Bulls-liðið hefur aftur á móti tapað þremur leikjum í röð. Jimmy Butler skoraði 24 stig fyrir Chicago og Pau Gasol var með 20 stig og 9 fráköst.

John Wall gaf 19 stoðsendingar og skoraði 12 stig að auki þegar Washington Wizards vann 113-99 heimasigur á Sacramento Kings. Marcin Gortat var með 27 stig og 16 fráköst og Garrett Temple skoraði 23 stig. DeMarcus Cousins skoraði 22 stig fyrir Sacramento.

Úrslit allra leikja í NBA-deildinni í nótt:

Washington Wizards - Sacramento Kings 113-99

Boston Celtics - Minnesota Timberwolves 113-99

New York Knicks - Orlando Magic 99-107

Atlanta Hawks - Portland Trail Blazers 106-97

Chicago Bulls - Brooklyn Nets 102-105

Houston Rockets - Charlotte Hornets 102-95

San Antonio Spurs - Indiana Pacers 106-92

Utah Jazz - Phoenix Suns  110-89

Los Angeles Clippers - Oklahoma City Thunder 99-100

Staðan í NBA-deildinni.