Kristinn fékk flotta afmæliskveðju á síðu Stella Azzurra Roma

Körfuboltamaðurinn Kristinn Pálsson heldur upp á átján ára afmælið sitt í dag en hann spilar í vetur sitt fyrsta tímabil með Marist háskólanum í Bandaríkjunum.

Kristinn er frá Njarðvík en hefur undanfarin ár spilað með ítalska unglingaliðinu Stella Azzurra frá Róm. Hann hefur alla tíð verið áberandi með yngri landsliðum Íslands og var í stóru hlutverki með átján ára landsliðinu síðasta sumar.

Kristinn var fyrirliði ítalska unglingaliðsins á síðasta tímabili sínu þegar Stella Azzurra Roma liðið varð tvöfaldur meistari í keppni 19 ára liða.

Stella Azzurra Roma liðið vann líka sinn riðil í Europleague framtíðarleikmanna og fór alla leið í úrslitakeppnina í Madrid.

Kristinn Pálsson lék með 18 ára landsliðinu síðasta sumar og var þá með 18,2 stig, 7,7 fráköst og 2,9 stoðsendingar að meðaltali í Evrópukeppninni þar sem Ísland endaði í sjötta sæti í b-deildinni.

Forráðamenn Stella Azzurra Roma eru ekki búnar gleyma Íslendingnum þótt að hann sé farinn að spila körfubolta hinum megin við Atlantshafið.

Kristinn fær nefnilega flotta afmæliskveðju á fésbókarsíðu Stella Azzurra Roma í dag þar sem hann er fullvissaður um að menn í Róm séu ekki búnir að gleyma honum.

Kristinn Pálsson hefur byrjað fyrstu átta leiki sína með Marist-skólanum sem er ekki sjálfgefið hjá leikmanni á fyrsta ári en í þeim hefur hann skorað 5,8 stig og tekið 3,9 fráköst að meðaltali.

Kristinn mun ekki spila leik á afmælisdeginum sínum en næsti leikur er á sunnudaginn á móti Army West Point skólanum.

Lì, nell'impronunciabile Poughkeepsie nello Stato di New York, dovrà probabilmente ancora svegliarsi, ma che ne dite di...

Posted by Stella Azzurra Roma on 17. desember 2015