Heimsfriðurinn æfir með Lakers

Leikmaðurinn Metta World Peace æfir þessa dagana með liði Los Angeles Lakers í NBA-deildinni en talið er að hann muni skrifa undir eins árs samning hjá félaginu á næstu dögum

World Peace, Ron Artest eða The Pandas Friend, hvað sem fólk kallar hann, gæti því snúið aftur til liðsins þar sem hann vann sinn eina meistaratitil á ferlinum vorið 2010.

Hefur hann verið á flakki undanfarin ár eftir að hafa yfirgefið Lakers en hann lék með New York Knicks í hálft ár, Sichuan Blue Whales í Kína í eitt tímabil og Pallacanestro Cantú í ítölsku deildinni í hálft tímabil.

Hinn 35 árs gamli World Peace æfði með Julius Randle, vali Lakers í nýliðavalinu fyrir einu ári síðan, í sumar til þess að bæta leik Randle en samkvæmt heimildarmönnum Yahoo Sports vonast forráðamenn Lakers til þess að hann sé búinn að róast niður og geti hjálpað ungum leikmannahóp Lakers í vetur.

Artest er hvað frægastur fyrir aðild sína að slagsmálunum sem áttu sér stað í leik Indiana Pacers og Detroit Pistons árið 2004 þegar hann var leikmaður Indiana.

Réðst Artest ásamt liðsfélögum sínum á áhorfenda og leikmenn Pistons en Artest fékk eins árs bann fyrir aðild sína að málinu.