Öryggisvörður Hornets þekkti ekki leikstjórnanda liðsins

Öryggisvörður á Time Warner Cable Arena, heimavelli Charlotte Hornets, lenti í heldur neyðarlegu atviki á dögunum þegar hann ætlaði að synja Jeremy Lin, nýjasta leikstjórnanda liðsins, aðgangi að höllinni er hann var að mæta til æfinga.

Lin sem sló eftirminnilega í gegn hjá New York Knicks fyrir fjórum árum hefur undanfarin ár verið á flakki um NBA-deildina en hann er kominn í sitt þriðja NBA lið á fjórum árum eftir stutt stopp hjá Houston Rockets og Los Angeles Lakers.

Skrifaði hann undir hjá Hornets í sumar og var að mæta til æfinga á dögunum þegar öryggisvörður stöðvaði hann. Þegar Lin sagðist vera leikmaður spurði öryggisvörðurinn hjá hvaða liði en hann komst hjá þessu eftir stutta stund og gat mætt til æfinga.

Tíst Lin um þetta má sjá hér fyrir neðan.

Went to the Hornets arena for 1st time and tried convincing security im a player. She said, "what team?!?" lollll #everywhereigo #literally

— Jeremy Lin (@JLin7) September 12, 2015