West Ham datt óvænt út í Rúmeníu | Ragnar og félagar komust áfram

Stjóratíð hins króatíska Slaven Bilic hjá West Ham fer ekki vel af stað en félagið datt í kvöld út úr undankeppni Evrópudeildarinnar eftir 1-2 tap gegn rúmneska félaginu Astra. West Ham rétt skreið í gegn um maltneska félagið Birkikara í 2. umferð eftir vítaspyrnukeppni en féll úr leik í kvöld.

Fyrri leik liðanna lauk með 2-2 jafntefli á heimavelli West Ham en Slaven Bilic stillti upp blöndu af lykilleikmönnum og ungum leikmönnum í leiknum í kvöld. Hamrarnir fengu sannkallaða draumabyrjun þegar lánsmaðurinn Manuel Lanzini skoraði fyrsta mark leiksins á 4. mínútu í fyrsta leik sínum fyrir félagið en rúmneska félagið var fljótt að svara. Tvö mörk á fimm mínútna kafla frá Constantin Budescu sneri leiknum heimamönnum í hag og náðu gestirnir frá Englandi ekki að jafna metin og knýja allavegana fram framlengingu. Er þátttöku West Ham í Evrópudeildinni í ár því lokið.

Ragnar Sigurðsson og félagar í Krasnodar lentu í kröppum dansi í Slóvakíu í leik liðsins gegn Slovan Bratislava en þrátt fyrir sigur Slovan Bratislava í kvöld komst Krasnodar áfram eftir að hafa sigrað 2-0 á heimavelli í Rússlandi. Gestirnir frá Rússlandi byrjuðu leikinn af krafti og komust 2-0 yfir eftir ellefu mínútna leik. Var staðan 2-0 fyrir Krasnodar í hálfleik en í seinni hálfleik kom Robert Vittek Slovan Bratislava yfir með því að skora þrennu á tuttugu mínútna kafla. Lengra komust leikmenn Slovan Bratislava ekki en Krasnodar gulltrygði sætið í 4. umferðinni með jöfnunarmarki undir lokin.

Þá lék Haukur Heiðar Hauksson allan leikinn í leik AIK og Atromitos í Grikklandi en gríska liðið vann fyrri leik liðanna 3-1 í Svíþjóð. Brasilíski leikmaðurinn Marcelinho gerði endanlega út um allar vonir AIK um miðbik seinni hálfleiks þegar hann skoraði eina mark leiksins.

Lærisveinar Guud Hiddink í Southampton áttu ekki í vandræðum með gamla félag hans Vitesse Arnheim en Graziano Pelle gerði út um allar vonir hollenska liðsins eftir aðeins fjórar mínútur er hann kom Dýrlingunum í 1-0 og samanlagt í 4-0 í einvíginu. Saido Mane bætti við öðru marki undir lok leiksins og lauk leiknum með 2-0 sigri Dýrlinganna sem mæta Newcastle í fyrstu umferð ensku úrvalsdeildarinnar á sunnudaginn.

Úrslit dagsins:



Dinamo Minsk 1-1 Zürich (2-1 samanlagt, Dinamo Minsk fer áfram)

Vaduz 2-2 Thun (2-2 samanalagt, Thun fer áfram á útivallarmörkum)

FC Kaupmannahöfn 2-3 Jablonec (3-3 samanlagt, Jablonec fer áfram á útivallarmörkum)

Astra 2-1 West Ham(4-3 samanlagt, Astra fer áfram)

St Etienne 1-2 ASA Targu Mures (4-2 samanlagt, St. Etienne fer áfram)

Vitesse 0-2 Southampton (0-5 samanlagt, Southampton fer áfram)

Zeljeznicar 0-1 St. Liege (1-3 samanlagt, St. Liege fer áfram)

Zorya 3-0 Charleroi (5-0 samanalagt, Zorya fer áfram)

Trnava 1-1 PAOK (1-2 samanlagt, PAOK fer áfram)

Slovan Bratislava 3-3 Krasnodar (3-5 samanlagt, Krasnodar fer áfram)

Dortmund 5-0 AC Wolfsberger (6-0 samanlagt, Dortmund fer áfram)

Atromitos 1-0 AIK (4-1 samanlagt, Atromitos fer áfram)

Aberdeen 1-1 Almaty (2-3 samanlagt, Almaty fer áfram)

Legia Varsjá 1-0 Kukesi (4-0 samanlagt, Legia fer áfram)

Vojvodina 0-2 Sampdoria (4-2 samanlagt, Vojvodina áfram)