NBA markaðurinn: Leonard fær risasamning og Lakers ræðir við Love

San Antonio Spurs hefur náð munnlegum samningum við Kawhi Leonard um nýjan samning, en frá því var gengið í nótt um leið og markaðurinn opnaði í NBA-deildinni.

Leonard, sem var kjörinn besti leikmaður lokaúrslitanna í fyrra þegar Spurs vann Miami, fær fimm ára samning sem tryggir honum 90 milljónir dollara í tekjur. Frá þessu greinir ESPN.

Spurs mun þó bíða með að ganga frá pappírsvinnunni þar til í næstu viku þannig liðið eigi fé undir launaþakinu til að eltast við LaMarcus Aldridge, kraftframherja Portland.

„Liðið mun líklega líta töluvert öðruvísi út á næstu leiktíð þar sem svo margir eru frjálsir á markaðnum og við viljum aðeins breyta til hjá okkur,“ sagði Gregg Popovich, þjálfari San Antonio, eftir leiktíðina.

Lakers ræðir við Love

Kevin Love, leikmaður Cleveland Cavaliers, rifti samningi sínum við félagið eins og hann mátti gera og er frjáls á markaðnum.

Fastlegar er búist við því að hann skrifi undir nýjan samning við Cleveland, en fram kemur í frétt ESPN að Los Angeles Lakers ætli þó að setjast niður með honum.

Forráðamenn Lakers eru sagðir meðvitaðir um að Love sé líklega ekki á leið burt frá LeBron og félögum en þeir vilja engu að síður ræða við leikmanninn.

Love meiddist í úrslitum austurdeildarinnar í ár og tók ekki þátt í lokaúrslitunum þar sem Cleveland tapaði fyrir Golden State, 4-2.