Gefa út fyrsta íslenska fótboltaleikinn í ágúst

Íslenska tölvuleikjafyrirtækið Digon Games hyggst gefa út fótboltaleikinn Kickoff – Club Managar í ágúst. Í leiknum eignast spilarar sitt eigið félag og etja kappi í rauntíma við vini og kunningja og aðra notendur leiksins.

Guðni Rúnar Gíslason, leikjahönnuður Digon Games, segir ýmsar nýjungar boðaðar í leiknum. „Þarna erum við að skapa einn heim þar sem notandinn etur kappi við vini og kunningja. Þú eignast knattspyrnufélag sem þú stjórnar og tekur þátt í byggja upp og nota til að keppa gegn vinum og öðrum andstæðingum í leiknum,“ segir Guðni. Hjá Digon Games starfa sex manns en unnið hefur verið að leiknum í um tvö ár.

Einn helsti kostur leiksins að mati Guðna er að notendur geta spilað leiki þegar þeim hentar en þurfa ekki að fylgja fyrirfram ákveðinni dagskrá. „Það gerir leikinn virkari fyrir vikið og leiðir því líka saman þá sem hafa tíma til að sökkva sér ofan í leikinn og þá sem eiga færri lausar stundir í tölvuleikjaspilun.“

Aðspurður um hvernig Kickoff sé frábrugðinn öðrum fótboltaleikjum segir Guðni að Kickoff sé töluvert aðgengilegri. „Öll hönnun og viðmót hafa verið útfærð með það að markmiði að allir geti skilið það sem fyrir augu ber. Við höfum sett mikla vinnu í að leikurinn sé aðgengilegur fyrir notendur,“ segir Guðni. Samkvæmt Guðna er útgáfan í ágúst ætluð fyrir notendur hér á landi. Leikurinn mun fyrst koma út vöfrum en í kjölfarið á spjaldtölvum og snjallsímum. Í kjölfarið er stefnt á markaðssetningu erlendis.