Leikmenn Clippers eru líklega ennþá ringlaðir | Myndbönd

Stephen Curry hefur átt magnað tímabil með Golden State Warroirs í NBA-deildinni í körfubolta og þessi skemmtilegi bakvörður er fastagestur í tilþrifapökkunum.

Það eru líka margir á þeirri skoðun að Stephen Curry verði kosinn besti leikmaður tímabilsins en mikil spenna er nú fyrir lokasprettinn enda Curry einn af mörgum sem koma til greina.

Stephen Curry er svakalega skytta sem má ekki fá frítt skot en það er þó leikni hans með knöttinn sem er að rugla margan varnarmanninn í ríminu.

Curry sýndi enn á ný snilli sína með boltann í sigurleik á móti Los Angeles Clippers í gærkvöldi.

Hann fór þá illa með bæði Chris Paul sem og félaga hans í liði Clippers áður en hann sendi langskot ofan í körfuna. Stephen Curry skoraði reyndar bara þrjár körfur í leiknum en tvær af þeim rötuðu í tilþrifapakka kvöldsins.

Hér fyrir neðan má sjá þessar tvær frábæru körfur Stephen Curry í leiknum á móti Los Angeles Clippers.