Berbatov: Arsenal hafði ekki efni á því að vanmeta okkur

Dimitar Berbatov átti mörg góð ár í enska boltanum og hann sýndi í kvöld gegn Arsenal að hann er ekki búinn að vera.

Berbatov skoraði annað mark Monaco í óvæntum 1-3 sigri liðsins á Arsenal í Meistaradeildinni í kvöld.

„Við höfum mikla trú á okkur og áttum skilið að vinna þennan leik. Þetta var frábær sigur hjá okkur," sagði sigurreifur Berbatov eftir leik.

„Þetta er samt ekki búið. Það er leikur eftir og Arsenal er með frábært lið. Við erum líka með gott lið en við vildum líklega vinna þennan leik meira en þeir. Við unnum flest einvígin á vellinum og skoruðum mörkin.

„Ég tel að Arsenal hafi ekki haft neitt efni á því að vanmeta okkur og ef þeir gerðu það þá er það þeirra vandamál."