Epísk ferð til Ibiza-fjarðar endar í „bromance“

Í ferðaþáttunum Illa farnir ferðast hinir viðkunnanlegu félagar Davíð Arnar, Arnar Þór og Brynjólfur um Ísland í sextán þáttum með það að markmiði að kynnast landinu og lenda í ævintýrum.



Strákarnir eru í miklu stuði í þessum þætti. Enda er stefnan sett á Ibiza-fjörð, eins og þeir kalla Ísafjörð. 

Brynjólfur reitir af sér brandarana alla ferðina. Tekur freestyle í bílnum og þusar við hvert tækifæri um bláskeljar, útlendinga í Þistilfirði, dauða hesta, vatnstófur og fleira.

Davíð og Brynjólfur fara síðan í eltingaleik við selina í firðinum en þeir bregða sér á kanó með Borea Adventures.

Þessi skemmtilega ferð endar síðan í miklum „bromance“ þegar strákarnir fara út að borða og vinastíflan brestur. Þar horfast þeir í augu og syngja saman við lagið Let Her Go með Passenger.