Þúsund sigurleikir hjá Popovich | Myndbönd

Gregg Popovich, þjálfari San Antonio Spurs, náði stórum áfanga á sínum ferli í nótt.

Þá nældi Popovich í sinn 1.000 sigur á ferlinum í NBA-deildinni. Spurs vann þá magnaðan 95-93 sigur á Indiana. Spurs var 14 stigum undir fyrir síðasta leikhlutann.

Það hefur enginn þjálfari í stóru, bandarísku íþróttunum verið lengur í starfi en Popovich. Hann er níundi þjálfarinn í sögu NBA sem nælir í 1.000 sigra.

Hann er búinn að vinna NBA-deildina fimm sinnum á nítján árum með Spurs. Aðeins Popovich og Jerry Sloan, fyrrum þjálfari Jazz, hafa náð að vinna þúsund leiki með sama liðinu.

Hér að neðan má sjá myndband úr leiknum, viðtal við Popovich og síðan myndband frá ferli hans.