Enn tapar Cavaliers | Davis fór á kostum í Utah | Myndbönd

Níu leikir voru á dagskrá NBA körfuboltans í Bandaríkjunum í nótt. Enn jókst á vandræði Cleveland Cavaliers sem tapaði fjórða leiknum í röð þegar liðið steinlá á heimavelli gegn Toronto Raptors.

Raptors hefur byrjað tímabilið frábærlega og unnið 11 af 13 leikjum sínum en Cavaliers með LeBron James í broddi fylkingar hefur aðeins unnið fimm af 12 leikjum sínum og nú tapað fjórum leikjum í röð því Raptors vann leik liðanna í nótt 110-93.

Cavaliers byrjuðu leikinn vel og voru þrettán stigum yfir eftir fyrsta leikhluta 34-21 en Raptors snéri leiknum sér í vil í öðrum leikhluta og var tveimur stigum yfir í hálfleik.

Raptors gerðu út um leikinn í seinni hálfleik og átti Cavaliers aldrei möguleika eftir hálfleikinn.

Varamaðurinn Louis Williams fór á kostum fyrir Raptors og skoraði 36 stig en hann hitti úr öllum 15 vítaskotum sínum í leiknum. Kyle Lowry skoraði 23 stig og DeMar DeRozan 20.

Kevin Love skoraði 23 stig fyrir Cavaliers og Kyrie Irving 21 en LeBron James skoraði aðeins 15 stig auk þess að gefa 10 stoðsendingar.

Anthony Davis fór á kostum fyrir New Orleans Pelicans sem skelltu Utah Jazz 106-94 á útivelli. Davis skoraði 43 stig en hann hitti úr 16 af 23 skotum sínum utan af velli og úr 11 af 12 vítaskotum sínum. Hann tók auk þess 14 fráköst.

Pelicans hefur unnið sjö af 12 leikjum sínum en Jazz fimm af 14. Gordon Hayward skoraði 31 stig fyrir Jazz.

Stórleikur næturinnar var í Houston þar sem heimamenn í Rockets mörðu nágrana sína í Dallas Mavericks 95-92 og það án Dwight Howard.

Rockets höfðu tapað tveimur leikjum í röð fyrir leikinn og Mavericks unnið sex í röð en James Harden sá til þess að Rockets kæmust á sigurbraut á ný þegar hann skoraði fimm af 32 stigum sínum undir lok leiksins.

Patrick Beverley skoraði 20 stig fyrir Rockets en Monta Ellis var stigahæstur hjá Mavericks með 17 stig. Miklu munaði um að Dirk Nowitzki náði sér ekki á strik en hann skoraði aðeins 11 stig úr 18 skotum utan af velli. Hann hitti ekki úr neinu af 8 þriggja stiga skotum sínum sem er mjög óvenjulegt fyrir Þjóðverjann öfluga.



Öll úrslit næturinnar:

Indiana Pacers – Phoenix Suns 83-106

Orlando Magic – Miami Heat 92-99

Cleveland Cavaliers – Toronto Raptors 93-110

New York Knicks – Philadelphia 76ers 91-83

Houston Rockets – Dallas Mavericks 95-92

Minnesota Timberwolves – Sacramento Kings 101-113

Milwaukee Bucks – Washington Wizards 100-111

San Antonio Spurs – Brooklyn Nets 99-87

Utah Jazz – New Orleans Pelicans 94-106

Davis og stigin 43: Nýliðinn Andrew Wiggins setur niður 29 stig: Duncan með sendingu yfir allan völlin: Cavaliers - Raptors: Rockets - Mavericks: