NBA: Lakers tapaði í framlengingu - Marc Gasol öflugur | Myndbönd

Það breyttist ekki mikið í NBA-deildinni í körfubolta í nótt. Los Angeles Lakers og Oklahoma City Thunder töpuðu enn einum leiknum og Memphis Grizzlies, liðið með besta sigurhlutfallið í deildinni, vann enn einn sigurinn.

Marc Gasol var með 30 stig og 12 fráköst þegar Memphis Grizzlies vann sannfærandi 107-91 heimasigur á Los Angeles Clippers en spænski miðherjinn sem er þekktari fyrir frábæra vörn en frábæra sókn hitti úr 13 af 18 skotum sínum. Courtney Lee bætti við 13 stigum fyrir Memphis-liðið sem hefur unnið 12 af fyrstu 14 leikjum sínum á tímabilinu.

Chris Paul var með 22 stig, 5 stoðsendingar og 4 stolna bolta fyrir Clippers-liðið sem var fyrir leikinn búið að vinna tvo leiki í röð. Jamal Crawford skoraði 19 stig og J.J. Redick var með 15 stig.

Marreese Speights skoraði 29 stig fyrir Golden Stata Warriors í 91-86 sigri á Oklahoma City Thunder en Speights hafði ekki skorað meira í leik síðan 2009. Klay Thompson var með 20 stig og Stephen Curry skoraði 15 í tíunda sigri Golden State í tólf leikjum. Reggie Jackson var með 22 stig, 11 fráköst og 8 stoðsendingar fyrir Oklahoma City en liðið tapaði þarna sínum sjötta leik í röð.

Kobe Bryant skoraði 27 stig en það dugði ekki þegar Los Angeles Lakers tapaði 94-101 á heimavelli á móti Denver Nuggets en það þurfti framlengingu til þess að útkljá leikinn. Bryant hitti aðeins úr 4 af 14 skotum sínum í fjórða leikhluta og framlengingu. Wilson Chandler var með 19 stig fyrir Denver og Ty Lawson  bætti við 16 stigum og 16 stoðsendingum. Denver hefur unnið 5 af síðustu sex leikjum sínum eftir að hafa aðeins unnið einn leik af fyrstu sjö.

Luol Deng skoraði 26 stig og þeir Chris Bosh og Mario Chalmers voru báðir með 20 stig þegar Miami Heat vann 94-93 heimasigur á Charlotte Hornets en Chalmers gaf einnig tíu stoðsendingar. Kemba Walker fékk tvö skot á síðustu 30 sekúndum leiksins til að skora sigurkörfuna en hvorugt gekk ekki frekar en lokaskot Al Jefferson (22 stig og 12 fráköst) og Charlotte-liðið tapaði sínum fimmta leik í röð.

LaMarcus Aldridge skoraði 20 stig og tók 14 fráköst þegar Portland Trailblazers fagnaði sínum sjöunda sigri í röð eftir að hafa unnið Boston Celtics 94-88.

Öll úrslit í NBA-deildinni í nótt:

Memphis Grizzlies - Los Angeles Clippers 107-91

Boston Celtics - Portland Trail Blazers 88-94

Miami Heat - Charlotte Hornets 94-93

Oklahoma City Thunder - Golden State Warriors 86-91

Los Angeles Lakers - Denver Nuggets 94-101 (framlengt)

Staðan í NBA-deildinni