Westbrook frábær í endurkomuleiknum | NBA í nótt

Leikstjórnandinn öflugi Russell Westbrook sneri aftur á körfuboltavöllinn eftir handarbrot þegar Oklahoma City Thunder vann öruggan sigur á New York Knicks í Chesapeake Energy Arena í nótt. Lokatölur 78-105, OKC í vil.

Westbrook fór mikinn í endurkomuleiknum, skoraði 32 stig, tók sjö fráköst og gaf átta stoðsendingar. Amar'e Stoudmire var stigahæstur hjá New York með 20 stig, en liðið lék án Carmelos Anthony sem glímir við bakmeiðsli.

Þetta var þriðja tap New York í röð, en OKC vann hins vegar tvo leiki í röð í fyrsta sinn á tímabilinu.

Memphis Grizzlies stöðvaði níu leikja sigurgöngu Portland Trail Blazers með 112-99 sigri í Portland. Memphis er sem fyrr efst í Vesturdeildinni, en liðið hefur unnið 14 af 16 leikjum sínum á tímabilinu.

Marc Gasol og Mike Conley fóru mikinn í liði Memphis í nótt, en liðið er ósigrað í tíu leikjum gegn liðum úr Vesturdeildinni.

Gasol skoraði 26 stig, tók sjö fráköst og gaf níu stoðsendingar og Conley daðraði við þrefalda tvennu með 21 stig, tíu fráköst og níu stoðsendingar.

San Antonio Spurs hefur heldur betur hrist af sér slyðruorðið eftir erfiða byrjun á tímabilinu og í nótt vann liðið sjötta sigur sinn í röð, og þann níunda í síðustu tíu leikjum, þegar Sacramento Kings voru lagðir af velli, 104-112.

Annan leikinn í röð gat Gregg Popvich, þjálfari meistaranna, ekki stýrt sínum mönnum vegna veikinda, en það kom ekki að sök. Frakkinn Tony Parker stóð upp úr í jöfnu liði Spurs með 27 stig og átta stoðsendingar.

Þá vann Dallas Mavericks góðan sigur á Toronto Raptors, toppliði Austurdeildarinnar, 106-102, en leikurinn fór fram á heimavelli Toronto í Kanada.

Monta Ellis var stigahæstur í liði Dallas með 30 stig, en liðið er í 6. sæti Vesturdeildarinnar.

Öll úrslit næturinnar:

Boston Celtics 102-109 Chicago Bulls

Charlotte Hornets 101-106 Golden State Warriors

Atlanta Hawks 100-91 New Orleans Pelicans

Detroit Pistons 88-104 Milwaukee Bucks

Toronto Raptors 102-106 Dallas Mavericks

Houston Rockets 85-102 Los Angeles Clippers

Oklahoma City Thunder 105-78 New York Knicks

Indiana Pacers 98-83 Orlando Magic

San Antonio Spurs 112-104 Sacramento Kings

Denver Nuggets 122-97 Phoenix Suns

Portland Trail Blazers 99-112 Memphis Grizzlies

Los Angeles Lakers 119-120 Minnesota Timberwolves

Westbrook var öflugur Svakaleg troðsla hjá Kenneth Faried Frábær sending hjá James Harden