Sögulegar endurkomur Clippers og Pacers

Indiana Pacers er komið í 3-1 gegn Washington Wizards í einvígi liðanna í undanúrslitum austurdeildar NBA eftir 95-92 sigur í spennandi leik liðanna í höfuðborginni í nótt.

Wizards var mest 16 stigum yfir í þriðja leikhluta og stóðst fyrsta áhlaup Indiana í þeim fjórða. En undir dyggri forystu Paul George með góðri hjálp frá miðherjanum Roy Hibbert tókst Indiana að vinna upp muninn og tryggja sér sigur.

George og Hibbert, sem virðist vaknaður eftir afar langan blund, skoruðu nánast öll stig gestanna á lokasprettinum en í heildina skoraði George 39 stig og tók 12 fráköst. Hann skoraði einnig sjö þriggja stiga körfur úr tíu tilraunum og er fyrsti maðurinn í sögunni sem nær þessum tölum í úrslitakeppninni.

Hibbert setti niður 17 stig og brosti sínu breiðasta í fjórða leikhluta en loksins lítur hann aftur út eins og körfuboltamaður. Bradley Beal skoraði 20 stig fyrir Washington sem þarf að vinna í Indiana í næsta leik ætli það að halda sér á lífi í einvíginu.

Los Angeles Clippers jafnaði einvígi sitt við Oklahoma City Thunder, 2-2, á heimavelli í nótt með góðum sigri, 101-99. Liðið var mest 16 stigum undir í fjórða leikhluta en þetta er í fyrsta skipti í sögunni sem tvö lið vinna upp 15 stiga forskot sama kvöldið og vinna leik í úrslitakeppninni. Söguleg nótt að baki.

Blake Griffin var stigahæstur heimamanna með 25 stig og 9 fráköst en Clippers vann fjórða leikhlutann, 38-24. Oklahoma City getur sjálfu sér um kennt að vera ekki 3-1 yfir í þessu einvígi. Chris Paul bætti við 23 stigum og 10 fráköstum.

Hjá OKC var KevinDurant í stuði en hann skoraði 40 stig og tók 7 fráköst. RussellWestbrok skoraði 27 stig og tók 8 fráköst en hann, eins og stundum áður, valdi nokkur slæm skot á lokasprettinum sem hjálpaði Clippers að vinna leikinn.

Í spilaranum hér að ofan má sjá falleg tilþrif frá Paul George, leikmanni Indiana, í nótt en hér að neðan er myndbrot frá einvigi Kevins Durants og Chris Pauls í leik OKC og Clippers.